Naqqiut


Namminersornerullutik Oqartussat nalunaarutaat nr. 8, 3. december 1984-imeersoq saarullinniarsinnaanermut akuersissutinut tunngasoq.

Inuutissarsiutigalugu aalisarneq pillugu Inatsisartut inatsisaanni nr. 14 21 november 1984-imeersumi -it 8, imm. 2 aamma 3, 9, 10, 12 aamma 14 inuutissarsiutigalugu aalisarnermut tunngasumi aalajangersarneqarpoq:

 

1. Nalunaarut Kalaallit Nunaata aalisarfittaani inuutissarsiutigalugu sarullinniarnermut inunnit piginneqatigiiffinnillu Inatsisartut inatsisaat nr. 14 21. november 1984-imeersoq 3 najoqqutaralugu aalisarsinnaanermut uppernarsaateqartunut atuuppoq.
Imm. 2. Nalunaarummi angallatit angissusii allassimapput uuttueriaatsit inatsit nr. 203-mi 18. maj 1977-imi umiarsuarnik uuttuisarnermut tunngasumi aamma siusinnerusukkut maleruagassani atuuttuni aalajangersakkat naapertorlugit. Angallatip usisinnaassusia aalajangiisuussaaq nalunaarut malillugu angallatip pineqartup angissusianut killigitinneqartup sorliup atorneqarnissaanut.

2. Angallatit 80 BRT imaluunniit BT 80-it anginerusullu atorlugit saarullinniarsinnaanermi akuersissummik tunngaveqartinneqassaaq.
Imm. 2. Angallatit ukiumi qinnuteqarfimmi akuersissuteqareersut akuersissummik tunniussinissami salliutinneqartassapput.
Imm. 3. Akuersissut qaammatisiutit malillugit ukiuusumut qinnutigineqartassaaq. Qinnuteqaat imm. 4-mi paasissutissanik taaneqartunik ilallugu Naalakkersuisunut Ilaasortamit tiguneqareersimassaaq kingusinnerpaamik 5. december qaammatisiutit malillugit ukiumi siuliani. Immikkut ittunik peqqutissaqartillugu killigititaq taanna Naalakkersuisunut Ilaasortap qinnuteqaatini ataasiakkaani allanngortissinnaavaa.
Imm. 4. Qinnuteqaat immersugassamut nalunaarummut matumunnga ilanngunneqartumut immersorneqassaaq.
Imm. 5. Akuersissutinik tunniussinissami piumasarineqarpoq angallatip inuttaasa minnerpaamik 70 %-iisa Kalallit Nunaanni aalajangersimasumik ukiuni marlunni najugaqarsimanissaat najugaqartuarnissaallu kiisalu kalaallinut inuiaqatigiinnut aalajangersimasumik inuutissarsiuteqavinnermik uppernarsaateqarnissaat. Piumasarisap naammassineqarsimaneranut uppernarsaat Kalaallit Nunaanni Aalisarsinnaanermut Uppernarsaatinik Nakkutilliivimmut nassiunneqassaaq piniariareernerit tamaasa inuttaasut allattorsimaffiannik immersuinikkut, tassungalu ilanngullugu allanneqassalluni aalisarsinnaanermut uppernarsaatip normua.
Imm. 6. Akuersissummi piumasarineqarpoq pisat agguarnerisa aalajangersimasut nunami tunisassiorfinni suliarineqartussanngorlugit nunnigunneqarnissaat. Akuersissummi   aamma piumasarineqarsinnaavoq pisat nunami tunisassiorfinnut aalajangersimasunut tunineqarnissaat.
Imm. 7. Immikkut peqqutissaqartillugu imm. 5-imi 6-imilu aalajangersakkat Naalakkersuisunut ilaasortap atunngitsoortissinnaavai.

3. Akuersissummik piginnittup toqunerani, piginneqatigiiffiup akuersissummik piginnittup atuukkunnaarnerani angallatilluunniit akuersissummik piginnittup tunineqarnerani annaanneqarsinnaajunnaarluniluunniit umiunerani akuersissut atorunnaarsinneqassaaq, isumaliutigineqaqqissinnaallunili paasineqarpat piumasarineqareersimasut nutaamik akuersissuteqarnissamut naammassineqarsimanersut.
Imm. 2. Akuersissut umiarsuarmiitinneqassaaq.

4. Akuersissummi annerpaamik pisarisinnaasat allassimassapput, aamma piffissap qanoq-ilinerani aalisarfimmi sumilu pisarineqarnissaat agguataarneqarsinnaallutik. Taamaaliornermi tunulequtarineqassapput pisarineqarsinnaatitaasut annertussusiisa, angallatit pisaqarsinnaassusiisa nunallu sua-tungaani aalisarnerup ineriartortinneqarnissaata pitsaaneruneranik nalileereernikkut.
Imm. 2. Naalakkersuisunut Ilaasortamit imm. 1-imi pisassaritinneqartut annertussusissaatut aalajangerneqarsimasut allanngortinneqarsinnaapput, pisassaritinneqartut  tamarmiusut aalajangiivigineqarneranni pisassaritinneqartut tamarmiusut pisarineqarsinnaanissaat eqqarsaatigalugu Naalakkersuisunut Ilaasortap naliliinera malillugu allannguuteqartitsinissaq pisariaqartinneqarpat. Aamma taamatut allanngortitsisoqarsinnaavoq piffissaq aalisarfiillu aalajangersimasut eqqarsaatigalugit.
Imm. 3. Aalisarneq taamaatinneqassaaq pisassat aannertussusii imm. 1-imi 2-milu aalajangersarneqarsimasut pisarineqarpata, imaluunniit imm. 1-imi 2-milu aalajangersakkat malillugit qanoq-iliuuseqartoqartariaqarpat. Aalisarnerli kingusinnerpaamik taamaatinneqassaaq Naalakkersuisunut Ilaasortaq rakio-kkut tusagassiutitigullu taanna pillugu nalunaaruteqarpat. Piffissamut aalisarfinnullu aalajangersimasunuinnarnulli taamatut nalunaaruteqarneq attuumassuteqarsinnaavoq.

5. Nalunaarummi matumani aalajangersakkanik unioqqutitsineq akiliisitaanermik aamma/imaluunniit akuersissummik arsaagaanermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartassapput.

6. Nalunaarut manna atuutilerpoq 1. januar 1985.
Imm. 2. Namminersornerullutik Oqartussat nalunaarutaat nr. 11. 3. november 1983-imeersoq saarullinniarsinnaanermut akuersissutinut tunngasoq 1. januar 1985 atorunnaarsinneqarpoq.




Nuuk, ulloq 3. december 1984.




Stephen Heilmann

/

Emil Abelsen


Ilanngussaq 1 (pdf-format)

Ilanngussaq 2 (pdf-format)