NAQQIUT


Namminersornerullutik Oqartussat nalunaarutaat nr. 2,  14. januar 1987-imeersoq 1987-imi saarullinniarsinnaanermut akuersissutinut tunngasoq.

Inatsisartut inatsisaanni nr. 11-mi 21. november 1984-imeersumi inuutissarsiutigalugu aalisarnermut tunngasumi 8, imm. 1 aamma 3, 9, 10, 12 aamma 14 najoqqutaralugit aalajangersarneqarpoq:

 

1. Nalunaarut Kalaallit Nunaata aalisarfittaani inunnut piginneqatigiiffinnulluunniit kalaallit angallataanik inuutissarsiutigalugu saarullinniarnermik ingerlatagartunut atuuppoq, tak. Inatsisartut inatsisaanni inuutissarsiutigalugu aalisarnermut tunngasumi 3.
Imm. 2. Nalunaarummi angallatit angissusii allassimapput uuttueriaatsit inatsit nr. 203-mi 18. maj 1977-imeersumi umiarsuarnik uuttuisarnermut tunngasumi aamma maleruagassani siusinnerusukkut atuuttuni aalajangersakkat naapertorlugit.

2. Angallatit 80 BRT-illit annerusulluunniit (angallatip uuttuinermut allagartaa uppernarsaataaluunniit malillugu) atorlugit saarullinniarneq akuersissummik tunngaveqartinneqassaaq.
Imm. 2. Akuersissut qaammatisiutit malillugit ukiuusumut qinnutigineqarlunilu tunniunneqartassaaq. Qinnuteqarnissamut killigititaq Naalakkersuisunut ilaasortamit aalajangerneqartassaaq. Qinnuteqaat qinnuteqarnermi immersugassamut Inuutissarsiornermi Pisortaqarfimmi pissarsiarineqarsinnaasumut immersorneqassaaq.
Imm. 3. Angallatit umiarsuarmi tunisassiorsinnaanermut akuersissuteqarfigineqartunut piumasarineqassaaq pisamik agguarnerisa aalajangersimasut nunami tunisassiorfinni tunisassiassanngorlugit nunniguttassagaat.
Imm. 4. Akuersissummi piumasarineqarsinnaavoq  pisat tunisassiorfinnut aalajangersimasunut tunineqartarnissaat.
Imm. 5. Nalunaarutip immikkut ittup kalaallit aalisariutaasa inuttalersugaanerannut tunngasup atulersinneqarnissaata tungaasut akuersissuteqarnermi piumasarineqarpoq minnerpaamik angallatip inuttaasa 70%-iisa Kalaallit Nunaanni ukiuni kingullerni marlunni najugaqarsimanissaat najugaqartuarnissaallu kalallinullu iniuaqatigiinnut aalajangersimasumik attuumassuteqarnissaat, uppernarsaatissaqartillugu aalisarnermik inuutissarsiuteqavinneq. Piumasaqaatip naammassineqarsimaneranut uppernarsaatit usingiareernerit tamaasa ullut 14-it qaangiutsinnagit Kalaallit Nunaanni Aalisarsinnaanermut Akuersissutinik Nakkutilliivimmut nassiunneqartassaaq inuttaasunut pisanullu allattuiffissap immersorneqarneratigut, tassunga ilanngunneqassaaq aalisarsinnaanermut allagartaq normua.
Imm. 6. Immikkut pissutissaqartillugu Naalakkersuisunut ilaasortaq imm. 5-imi piumasarineqartut atunngitsoortissinnaavai.

3. Angallammut aamma/imaluunnit umiarsuaatileqatigiinnut pineqartunut pisarineqarsinnaatitaasut akuersissummi allassimassapput.
Imm. 2. Aalisarneq unitsinneqassaaq
a) pisassarititaasut imm. 1-imi aalajangersarneqaarsimasut pisarineqarpata,
b) pisassatut akuersissutigineqartut tamarmiusut pisarineqarpata.
Imm. 3. Akuersissut umiarsuarmiitinneqassaaq.

4. Akuersissut allamut tunniunneqarsinnaanngilaq.
Imm. 2. Akuersissummik piginnittup toqunerani, piginneqatigiiffiup akuersissummik piginnittup atuukkunnaarnerani angallatilluunniit akuersissummik piginnittup annaanneqarsinnaajunnaarluni umiunerani akuersissut atorunnaarsinneqassaaq, isumaliutigineqarsinnaallunili paasineqarpat piumasarineqareersimasut nutaamik akuersissuteqarnissamut naammassineqarsimanersut.

5. Nalunaarummi matumani aalajangersakkanik  unioqqutitsineq akiliisitaanermik aamma/imaluunniit akuersissummik arsaagaanermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartassapput.

6. Nalunaarut manna saqqummiunneqarnermigut atortuulerpoq.
Imm. 2. Tanna ilutigalugu Namminersornerullutik  Oqartussat nalunaarutaat nr. 15, 11. april 1986-imeersoq 1986-imi saarullinniarnermut akuersissutinut tunngasoq atorunnaarsinneqarpoq.




Nuuk, ulloq 14. januar 1987




Moses Olsen

/

Einar Lemche