1987-imi Kalaallit Nunaata Kitaani saarullinniarnermi bundgarnit atoqqusaannginnerat pillugu Namminersornerullutik Oqartussat nalunaarutaat nr. 15, 26. maj 1987-imeersoq.

Inuutissarsiutigalugu aalisarneq pillugu inatsisartut inatsisaat nr. 11 21. november 1984-imeersumi 14, imm. 1 malillugu aalajangerneqarpoq:

 

1. Kalaallit Nunaata kujammut isuata (Kap Farvel) kitaanut nalunaarut atuuttuuvoq.

2. Bundgarnit atorlugit saarullinniarneq inerteqqutaavoq.
Imm. 2. Imm. 1-imi qanorluunniit aalajangiisoqarsimagaluarpat bundgarnersorluni saarullinniartoqarsinnaatitsisoqarsinnaavoq, saarulleeqqat pisarineqartunut tunngatillugu isumaqartoqarpat tamanna illersorneqarsinnaasoq, aammalu saarulleeqqat pisarineqartut amerlassusaasa killilerneqarsimaartuarnerat ingerlanneqartuarpat.

3. 2-mi imm. 2 aalajangiineq tunngavigalugu akuersissutinik tunisineq arsaarinninnerlu tunisassiornermi ataatsimiititalianit suliarineqartassaaq tunisassiorfinni ukunaniittuni Nanortalik, Alluitsup Paa, Narsaq, Paamiut, Maniitsoq, Sisimiut, Kangaatsiaq, Aasiaat, Qasigiannguit Ilulissallu, taamatuttaarlu aamma tunisassiorfinni siulersuisunit ukunani Qaqortoq, Arsuk, Qeqertarsuatsiaat aamma Nuuk. Tunioraanerit arsaarinninnerillu Aalisarnermut Suliffissuaqarnermullu Naalakkersuisoq sinnerlugu suliarineqartassapput.
Imm. 2. Akuersissutinik tunioraanissat arsaartuinissallu tamanut nalunaarutigineqartassapput imm. 1-imi tunisassiorfinnit taaneqartunit.
Imm. 3. Imm. 1 najoqqutaralugu aalajangiussat illua-tungeriinnit tassunga attuumassuteqartunit naalakkersunut ilaasortamut saqqummiunneqarsinnaapput.

4. 2 tunngavigalugu bundgarnersorluni aalisarsinnaanernik tunioraasoqarsinnaanngilaq piffinni imaluunniit piffissani aalajangersimasuni taamatut aalisarnermi pisarisat 30%-ii sinnerlugit takissuseqarpata 40 cm-inik imaluunniit taanna ataallugu.

5. Bundgarnersorluni saarullinniarneq piffinni imaluunniit piffissani aalajangersimasuni 3, imm. 1 aalajangersagaq malillugu akuersissummik peqarani ingerlanneqarpat akiliisitaasoqarsinnaavoq. Suliassat pineqartunut tunngasut inatsisartut inuutissarsiutigivillugu aalisartuunnermut inatsisaata maleruagassartai malillugit suliarineqarsinnaapputtaaq.

6. Nalunaarut erniinnartumik atuutilissaaq.
Imm. 2. Nalunaarut atuutissaaq 31. december 1987 tikillugu.




Nuuk, ulloq 26. maj 1987




Moses Olsen

/

Einar Lemche