1999-imi sinerissamut qanittumi raajarniarnermi ilassutaasumik pisassiissutit pillugit Namminersornerullutik Oqartussat nalunaarutaat nr. 17, 5. oktober 1999-imeersoq

Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, kingullermik inatsisartut inatsisaatigigut nr. 6, 20. maj 1998-imeersukkut allanngortinneqartumi, 10, 14, imm. 1, imm. 2 aamma 3, naapertorlugit aalajangersarneqarpoq:

 

Atuuffia

1. Nalunaarut innuussutissarsiutigalugu raajarniarnermut imartani Kalaallit Nunaata aalisarnikkut oqartussaaffigisaani inunnit ingerlatseqatigiiffinnilluunniit aalisarneq pillugu inatsisartut inatsisaat nr. 18, 31. oktober 1996-imeersumi 6 naapertorlugu kalaallit angallataannik, angallatip usitussutsimut uuttuuta malillugu 75/BRT/120 BT-init mikinerusunik, ingerlanneqartumut atuuppoq.
Imm. 2. Taamatuttaaq nalunaarut angallatinut radiukkut attaveqartilluni ima ilisarnaatilinnut atuuppoq: OZJO, OUHK, OUUC, OZTZ, OULB, OVXD, OWES, OYKA, OVOJ, OWMZ aamma OZTJ.
Imm. 3. Nalunaarummi pineqarput qulaani taaneqartut angallatit, 1. januar 1999-imi aamma nalunaarutip atuutilerfiani inuussutissarsiutigalugu raajarniarnermut akuersissummik peqartut.

2. Nalunaarut manna naapertorlugu angallatip ilassutaasumik pisassiissutinik tunineqarsinnaaneranut apeqqutaassaaq KANUAANA-mi 1. oktober 1999-imi pisassiissutinit ilanngaasiinernik nalunaarsukkat malillugit angallatip pisaasa aallaqqaammut ukiumoortumik pisassiissutigineqartut aamma 1999-imi siusinnerusukkut ilassutaasumik pisassiissutigineqartut 75 %-iisut minnerpaamik annertussuseqarnerat.

3. Angallatit 2-mi piumasaqaataasunik naammassinnittut nalunaarutip atuutilersinneqarnerani 100 tonsinik ilassutaasumik pisassinneqassapput.

4. Angallatinut arlaqartunut akuersissut ataaseq atorlugu aalisartunut, 1. januar 1999-imilu ukiumut pisassiissutinik ataatsimoortumik tunineqarsimasunut, angallatit ataasiakkaat usitussutsimut angissusiat naapertorlugu ilassutaasumik pisassiissutit angallatinut ataasiakkaanut agguaanneqassapput.

5. Angallatip usitussutsimut angissusia angallatip angissusianut uppernarsaammi allassimasoq usitussutsimut angissusiliunneqassaaq, uuttueriaatsinik maleruagassat suulluunniit angallatip angissusianut uppernarsaasiinermi atorneqarsimanerat apeqqutaatinnagu.

 

Allanut atugassanngortitsineq aamma ukiumoortumik pisassiissutit nalunaarutigineqarnerat

6. Ilassutaasumik pisassiissutit allanut atugassanngortinneqarsinnaanngillat.

7. Naalakkersuisut nalunaarutip atuutilersinneqarnerani angallatinut ilassutaasumik pisassiissutinik agguaavigineqartunut 1999-imi ukiumoortumik pisassiissutit nutaat nalunaarutigissavaat.

 

Atuutilerfia

8. Nalunaarut manna 6. oktober 1999-imi atuutilerpoq. Nalunaarut 1. januar 2000-imi atorunnaassaaq.
Imm. 2. 1999-imi sinerissamut qanittumi raajarniarnermi ilassutaasumik pisassiissutaagallartut pillugit Namminersornerullutik Oqartussat nalunaarutaat nr. 6, 27. maj 1999-imeersoq suli atuuppoq.




Namminersornerullutik Oqartussat, ulloq 5. oktober 1999




Simon Olsen

/

Peder Munk Pedersen