Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaat nr. 2, ulloq 31. maj 1999-imeersoq.

Inuutissarsiutinik ilinniartitsisarnermik Kalaallit Nunaannut inatsimmi nr. 582-imi, 29. november 1978-imeersumi 1 naapertorlugu aalajangersarneqarput:

 

Kapitali 1.
Inuussutissarsiutinut ilinniartitaanerit inuussutissarsiutinullu pikkorissartitsisarnerit siunertaat

1. Inuussutissarsiutinut ilinniartitaanerit inuussutissarsiutinullu pikkorissartitsisarnerit ataqatigiissaakkat namminersortut pisortallu suliassaqarfiutaannut assigiinngitsunut sammititat Kalaallit Nunaata Inatsisartuisa inuussutissarsiornermut suliffeqarnermullu tunngasutigut naalakkersuinikkut anguniagaat naapertorlugit Naalakkersuisut aaqqissussavaat.
Imm. 2. Ilinniartitaanermik aaqqissuussineq taanna ima aaqqissugaassaaq sapinngisamik
1) inuusuttut ilinniagaqarnissamut kajumilersissallugit qularnaassallugulu inuusuttut inuussutissarsiutinut ilinniagaqalerusuttut imaluunniit inuussutissarsiutinut pikkorissarusuttut tamarmik tassunga ilinniagassallu pikkorissarnerilluunniit amerlanerusut ilaannik toqqaanissamut periarfississallugit,
2) inuusuttut ilinniagaqartissallugit siunissami sulinissaminnut tunngavigisassaannik, inuttut ineriartuutigisassaannik inuiaqatigiinnullu taakkulu ineriartornerannut paasinnissutigisassaannik,
3) suliffeqarnermi inuussutissarsiutitigut ilisimasariaqakkat piginnaassutsillu pisariaqartitat inuussutissarsiornermi inuiaqatigiinnilu ineriartornermi, taakkununnga ilanngullugu inuussutissarsiutit ilutsimikkut ineriartornerat, suliffeqarnermut tunngasut, suliffiit aaqqissugaanikkut atortorissaarutillu ineriartortitsivigineqarneranni mianerisassat mianeralugit nalilikkat naammassissallugit, aamma
4) ilinniagaqartut Kalaallit Nunaanni avataanilu ilinniagaqaqqinnissamut tunngavississallugit.

 

Nassuiaatit

2. Inuussutissarsiutinut ilinniaqqaatissaq tassaavoq paarlakaajaariffiusumik ilinniartitaaneq, taamaalilluni paarlakaajaanneqassallutik suliffimmi sungiusarluni ilinniartitaaneq aamma atuarfimmiilluni ilinniartitaaneq. Inuussutissarsiutinut ilinniarnerup tunngaviusup imarissavai ilinniagassat tunngaviusut, ilinniagassat sammisamut aalajangersimasumut tunngasut, ilinniagassat immikkut sammisassat aammalu immaqa ilinniagassaq qinigassaq, ilinniarnerlu aallartinneqassappat ilinniartuunissamut atsiueqatigiilluni isumaqatigiissuteqartoqarsimassaaq imaluunniit ilinniartuunissamik isumaqatigiissuteqartoqarsimassalluni, atuarfimmi suliffimmi sungiusarnissamut tigutissimanngikkaanni, tak. 11, imm. 4.
Imm. 2. Inuussutissarsiutinut ilinniartitaanerit allat tassaapput ilinniartitaanerit inuussutissarsiutinut atuarfimmi atuagarsorluni ilinniartitaanertut annermik ingerlanneqartut. Ilinniartitaanernut taakkununnga akuliunneqarsinnaapput suliffimmi sungiusarnerit sivikinnerusut.

 

Kapitali 2.
Inuussutissarsiutinut ilinniartitaanerit aqunneqarnerat

3. Inuussutissarsiutinut ilinniartitaanermut tunngasut pillugit sammisassat oqaluuserineqarnissaannut ataatsimiititaliat Kultureqarnermut, Ilinniartitaanermut Ilisimatusarnermullu Naalakkersuisup pisariaqartitsineq malillugu pilersissinnaavai.

4. Susassaqarfiit ilinniagassatigut imminnut qanittut annertunerit tamat iluini qitiusumik ilinniartitaanermut ataatsimiititalianik pilersitsisoqassaaq ilinniakkat ataasiakkaat suliassatigut imarisassaasa qaffasissusissaasalu qulakkeerneqarnissaat annermik siunertaralugu.
Imm. 2. Qitiusumik ilinniartitaanernut ataatsimiititaliat pillugit maleruagassat, taakkununnga ilanngullugit toqqartorneqarnissaat ilaasortalersugaanerallu, suleriaasissaat oqartussaassusiilu, Naalakkersuisut aalajangersassavaat.

5. Kommunit tamat iluini najukkami inuussutissarsiutinut ilinniartitaanermut ataatsimiititaliaq pilersinneqassaaq najukkani ilinniartitaanerit peqataatinneqalernissaasa qulakkeerneqarnissaa annermik siunertaralugu.
Imm. 2. Najukkani inuussutissarsiutinut ilinniartitaanermut ataatsimiititaliaq pillugu maleruagassanik, taakkununnga ilanngullugit toqqartorneqarnissaat ilaasortalersugaanerallu pillugit malittarisassanik, suleriaasissaannik oqartussaassusiinillu Naalakkersuisut aalajangersaasinnaapput.

6. Ilinniartitaanerit nutaat pilersinneqarnissaannik ilinniartitaanernillu atorunnaarsitsinissamik Naalakkersuisut akuersissuteqarsinnaapput. Tamatumani maleruagassanik Naalakkersuisut aalajangersaasinnaapput.

7. Ilinniartitaanerit pillugit maleruagassanik nalinginnaasunik Naalakkersuisut aalajangersaasinnaapput.
Imm. 2. Inuussutissarsiutinut ilinniartitaanermut tunngasut aqutaanerat pillugu maleruagassanik Naalakkersuisut aalajangersaasinnaapput, tassunga ilanngullugit ataatsimiititaliamut ilaasortat akissarsiaassaannut tunngasunik.
Imm. 3. Ilinniartitaanernut ataasiakkaanut maleruagassanik Naalakkersuisut aalajangersaasinnaapput. Ilinniartitaanerit ataasiakkaat imarisaat pillugit maleruagassat aalajangersarneqassapput qitiusumik ilinniartitaanermut ataatsimiititaliat inassuteqaateqareernerisigut.

 

Kapitali 3.
Ilinniartitaanerni tiguneqarsinnaaneq

8. Inuussutissarsiutinut ilinniaqqaatissami toqqaannartumik tiguneqarsinnaanermut tunngavissaatitaasut suunissaannut maleruagassanik Naalakkersuisut aalajangersaasinnaapput.
Imm. 2. Inuussutissarsiutinut ilinniartitaanerup akuerisaasup aallartiffianik naammaginartumik angusaqarluni naammassinnissimasoq kinaluunniit inuussutissarsiutinut ilinniartitaanermi tiguneqarsinnaavoq, taamaattoq tak. imm. 3 aamma 9.
Imm. 3. Inuussutissarsiutinut ilinniarnerit tunngaviusut ilaasa iluini tiguneqarnissamut pikkorissartitsinerit immikkut aaqqissuussat imaluunniit inuussutissarsiutinut ilinniaqqaammi ingerlaqqinnissamut ilaatillugu ilinniartup tiguneqannginnermini naammassinnissimanissaanik aalajangersakkanik Naalakkersuisut aalajangersaasinnaapput.
Imm. 4. Inuussutissarsiutinut ilinniartitaanernut allanut tiguneqarsinnaanermut piumasaqaatit Naalakkersuisut aalajangersassavaat.

9. Atuarfik inuussutissarsiutinut ilinniartitaanernik neqeroorutigisaminut qinnuteqartunik tamanik 8 malillugu tiguneqarnissamut piumasaqaatinik naammassinnittunik tigusinissaminut imaluunniit taakku atuarfimmi allami ilinniakkamut taamaattumut tiguneqarnissaat isumagissallugu pisussaavoq, taamaattoq tak. 10.
Imm. 2. Ilinniartitaanernut Kalaallit Nunaata avataani ingerlanneqartunut tiguneqarnissat Kultureqarnermut, Ilinniartitaanermut Ilisimatusarnermullu Pisortaqarfiup imaluunniit pisortaqarfiup tamatumunnga piginnaatitaata aalajangiiffigissavai.
Imm. 3. Naalakkersuisut maleruagassat aalajangersarsinnaavaat
1) atuarfiit akornanni suleqatigiinnissat pillugit,
2) atuarfinni ataasiakkaani ilinniartitaanerit neqeroorutigineqartut pillugit,
3) atuarfiit ilinniakkanik assigiinnik ingerlatsiviusut arlallit akornanni ilinniartut agguataarneqarnissaat pillugu.

10. Suliffissaqartitsinissamut periarfissat eqqarsaatigalugit ilinniakkani ataasiakkaani ilinniartussanik tigusinissamut killiliisinnaanermut maleruagassanik Naalakkersuisut aalajangersaasinnaapput.

 

Kapitali 4.
Ilinniartitaanerit ilusii

11. Inuussutissarsiutinut ilinniarnerit tunngaviusut aaqqissugaassapput paarlakaajaariffiusumik ilinniartitsinertut, taamaalilluni paarlakaajaanneqassallutik atuarfimmi ilinniartitaaneq aamma suliffimmi sungiusarluni ilinniartitaaneq. Atuarfimmi ilinniartitaaneq inuussutissarsiutinut atuarfinni Kultureqarnermut, Ilinniartitaanermut Ilisimatusarnermullu Pisortaqarfimmit akuerisaasuni ingerlanneqassapput.
Imm. 2. Inuussutissarsiutinut ilinniartitaanerit allat nalinginnaasumik aaqqissugaassapput atuagarsorluni ilinniartitaanertut, kiisalu inuussutissarsiutinut atuarfinni Kultureqarnermut, Ilinniartitaanermut Ilisimatusarnermullu Pisortaqarfimmit akuerisaasumi ingerlanneqassallutik. Ilinniartitaanerit aaqqissugaasinnaapput sivikinnerusumik suliffimmi sungiusarnertalerlugit.
Imm. 3. Inuussutissarsiutinut ilinniartitaanerit atuarfinni, suliffeqarfinni suliffinnilu allani ingerlanneqarsinnaanerat Naalakkersuisut akuersissutigisinnaavaat.
Imm. 4. Aaqqissuussisoqarsinnaavoq suliffimmi sungiusarluni ilinniartitaanerit atuarfimmi ingerlanneqarsinnaasunngorlugit. Tamatumani maleruagassanik Naalakkersuisut aalajangersaasinnaapput.

12. Ilinniartitaanerit ataasiakkaat sivisussusissaat ilusiligaanissaallu, taakkununnga ilanngullugit atuarfimmi ilinniartitaanerup aamma suliffimmi sungiusarluni ilinniartitaanerup qanoq agguataarneqarnissaat, pillugit maleruagassat qitiusumik ilinniartitaanernut ataatsimiititaliat inassuteqaateqareernerisigut Naalakkersuisut aalajangersarsinnaavaat.
Imm. 2. Inuit ilinniagaqarnikkut suliaqarsimanikkulluunniit immikkut tunngavissaqareersut
1) ilinniartitaanerit ilaanni peqataanngissinnaanerat pillugu,
2) ilinniartitaanerisa sivisussusissaannut ilusiligaanissaannullu
maleruagassat qitiusumik ilinniartitaanermut ataatsimiititaliat inassuteqaateqareernerisigut Naalakkersuisunit aalajangersarneqarsinnaapput.
Imm. 3. Ilinniartut allatut ilinniarsimaneq sulisimanerluunniit tunngavigalugit atuarfimmi ilinniartitaanerup imaluunniit suliffimmi sungiusarluni ilinniartitaanerup ilaani peqataanngitsinneqarsinnaanerat pillugu qitiusumik ilinniartitaanermut ataatsimiititaliat aalajangiissapput.

13. Ilinniartitaanerit Kultureqarnermut, Ilinniartitaanermut Ilisimatusarnermullu Pisortaqarfimmit ilinniagassat sammisamut aalajangersimasumut tunngasut imminnut qanittunut annertunernut immikkoortitaarneqarsinnaapput. Ilinniartitaaneq susassaqarfinnut ilinniagassatigut imminnut qanittunut arlalinnut attuumassuteqarsinnaavoq.

14. Ilinniartitaanerit assigiinngitsut siammasissunngorlugit aaqqissuunniarneqassapput, tassa suliassaqarfinnut sulianullu tunngasutigut siammasissuussapput ilinniaqqinnissamut tunngaviunissaat siunertaralugu, aamma qaffasinnerusumik ingerlaqqinnissamut tunngaviunissaat eqqarsaatigalugu.

15. Qitiusumik ilinniartitaanermut ataatsimiititaliap inassuteqaateqareerneratigut tapertaasumik pikkorissartitsinerit Naalakkersuisut aaqqissorsinnaavaat ilinniartut inuussutissarsiutinut ilinniartitaanermut aallartissimasamit allaasumut aammalu inuussutissarsiutinut ilinniartitaanermut ilinniakkamit suliaqarfimmilluunniit allaasumut nuussinnaanissaat siunertaralugu.

16. Atuarfimmi ilinniartinneqarneq akeqanngilaq, taamaattoq tak. imm. 3-4 aamma 17.
Imm. 2. Ilinniartitsissutit nalinginnaasut ilinniartitsinermi pisariaqartinneqartut atuarfimmit ilinniartunut atugassanngortinneqassapput akeqanngitsumik, taamaattoq tak. imm. 3.
Imm. 3. Kultureqarnermut, Ilinniartitaanermut Ilisimatusarnermullu Pisortaqarfiup aalajangersinnaavaa ilinniartut ilinniartitsissutinik killilimmik namminneq pissarsinissaat.
Imm. 4. Atuarfik, 11 imm. 3 malillugu inuussutissarsiutinut ilinniartitaanernik neqerooruteqartoq, imm. 1-3-mut aalajangersakkat apeqqutaatinnagit ilinniartitsinernut il.il. akiliuteqaqqusisinnaavoq. Aatsaalli taamaaliortoqarsinnaavoq atuarfik, tak. 11 imm. 3, inuussutissarsiutinut ilinniarfiit akuerisaasut assigalugit Namminersornerullutik Oqartussanit tapiiffigineqarneq ajorpat.

17. 16-imi aalajangersakkat apeqqutaatinnagit aningaasartuutit ilaannakortumik inunnit ataasiakkaanit suliffeqarfinnilluuniit namminersortunit akilerneqarnissaat Naalakkersuisut pisuni immikkut ittuni akuerisinnaavaat .
Imm. 2. Aningaasartuutit akilerneqarnissaat pillugu maleruagassanik erseqqinnerusunik Naalakkersuisut aalajangersaasinnaapput.

 

Kapitali 5.
Ilinniartitaanerit imarisaat


Ataatsimut aalajangersakkat

18. Ilinniartitaanerit imarisaat aaqqissorneqassapput anguniakkat 1, imm. 2-mi taaneqartut mianeralugit, taamaalilluni suliffimmi sungiusarluni ilinniartitaaneq atuarfimmilu ilinniartitaaneq ataqatigiissumik ingerlanneqarsinnaanngorlugit.
Imm. 2. Ilinniartitaanerit imarisaat suliffeqarnermi maannakkut siunissamilu piginnaassusissanik pisariaqartitanut naapertuutissapput.

 

Atuarfimmi ilinniartitaaneq

19. Ilinniartitaaneq atuarfimmi ilinniartitaanerup nalaa tamarmi suut tamaasa ataatsimut isigalugit sulianut tunngasumik atuagarsornermillu ilinniartitsiviussaaq ilinniartut nalinginnaasunik immikkullu piginnaasanik pisariaqartinneqartunik pigisaqalersinnaaqqullugit, tassunga ilanngullugit
1) ilinniartut ingerlatassanut ilinniartitaanerit siunnerfiinut, tassungalu atatillugu atortorissaarutit naleqquttut pisariaqarneratut ilisimasassartaannut pisariaqarneratullu atuisinnaassuseqalerfiginissaannut tunngavissiussallugit,
2) ilinniartut tunngavississallugit nammineerlutik aamma tapertamik ilinniarnikkut ilinniaqqinnikkullu piginnaasaminnik annertusaanissamut, taakkununga ilanngullugu ilinniaqqinnissamut tunngavississallugit,
3) ilinniartut inuttut ineriartornerannut ilapittuutaassalluni aamma
4) ilinniartut inuiaqatigiinnut taakkulu ineriartornerannut, pingaartumik suliffiit sulisorisallu nalinginnaasumik inuussutissarsiornermi inuiaqatigiinnullu atatillugu inissisimanerinik kiisalu suliassaqarfinnut tunngasunik suliffinnullu tunngasunik paasinninnerulersissallugit.

20. Ilinniartitaanerup aaqqissuunneqarnerani ilinniartut atugarisaat mianerineqassapput ilinniartitsinerullu allanngorartuutinneqarnissaa anguniarneqassaaq ilinniartut tunngavissarisaat soqutigisaallu mianeralugit.

21. Ilinniartitsineq nalinginnaasumik aaqqissuunneqassaaq imaalillugu, piffissap atuarfimmiiffiup siulliup siulliilluunniit imarissallugit sammisassat, ilinniartitaanerni arlalinni ataatsimoorunneqartut aammalu atuarnerup ingerlanera suliamut tunngasutigut immikkut piukkunnarsarfiussalluni.

22. Ilinniartitaanerni ataasiakkaani tunngaviusumik ilinniagassat, ilinniagassat sammisamut aalajangersimasumut tunngasut, immikkut ilinniagassat aamma ilinniagassanut qinigassanut siunnersuutit qitiusumik ilinniartitaanermut ataatsimiititaliat inassuteqaateqareernerisigut Kultureqarnermut, Ilinniartitaanermut Ilisimatusarnermullu Pisortaqarfimmit akuersissutigineqassapput. Ilinniagassanut allanut siunnersuutit qitiusumik ilinniartitaanermut ataatsimiititaliat inassuteqaateqareernerisigut Kultureqarnermut, Ilinniartitaanermut Ilisimatusarnermullu Pisortaqarfimmit akuersissutigineqassapput.
Imm. 2. Ilinniagassat siunertaat, imarisaat piffissaq ilinniartitsiviusussatut inassutigineqartoq naliliinissamilu tunngavissiat pillugit maleruagassat Naalakkersuisunit aalajangersarneqarsinnaapput.

23. Tunngaviusumik ilinniagassanut ilaapput suliamut tunngasunik atuagarsornermillu ilinniartitsineq inuussutissarsiutinut ilinniartitaanerni suliassanut tunngasutigut periarfissaqarfiulluartussat. Peqatigisaanik ilinniagassat tunngaviusut siunertaraat inuttut ineriartorluartitsinissaq ilinniakkamut tunngavissiuilluartussaq inuiaqatigiinnullu taakkulu ineriartornerannut paasinninnerulersitsisussaq.
Imm. 2. Ilinniagassanut sammisamut aalajangersimasumut tunngasut tassaapput atuagarsiorfiunngitsumik atuagarsiorfiusumillu ilinniartitsinerit, inuussutissarsiutinut nalinginnaasumik kiisalu immikkut piginnaasaqalersitsiviusussat.
Imm. 3. Ilinniagassat immikkut sammisassat tassaapput inuussutissarsiutinut ilinniartitaanerni sulianut tunngasutigut qaffasinnerpaatut, suliamut tunngasunik atuagarsornermillu ilinniartitsinerit ilinniartitaanerup ilaanut immikkoortut ilinniartumut immikkut suliamut piginnaasaqaataalersussat. Ilinniartut ilinniagassanik ilinniartitaanermut pineqartumut akuerisaasut ilaannik immikkut sammisassatut toqqaassapput.

24. Ilinniagassat qinigassat ilinniartut soqutigisaasa naammassineqarnissaannut naleqquttuussapput. Ajornanngikkaangat ilinniagassat ilinniaqqinnissamut ingerlaqqillunilu ilinniarnissamut tiguneqarnissamut pingaaruteqartut neqeroorutigineqassapput. Aammattaaq neqeroorutigineqarsinnaapput ilinniagassat qinigassat ilinniakkap tamanut tunngatillugu qaffasissusaanut naleqquttut najukkani pitsaassutsimik pisariaqartitsineq suliffissaqarnikkullu periarfissat eqqarsaatigalugit.

25. Ilinniartut ilinniagassamik inuussutissarsiutissamillu toqqaaniarnerminni ilitsersorneqarnissaminnik neqeroorfigineqassapput.
Imm. 2. Tamatumani maleruagassanik erseqqinnerusunik Naalakkersuisut aalajangersaasinnaapput.

 

Suliffimmi sungiusarluni ilinniartitaaneq

26. Suliffimmi sungiusarluni ilinniartitaaneq pissaaq suliffimmi ataatsimi arlalinniluunniit qitiusumik ilinniartitaanermut ataatsimiititaliamit akuerineqarsimasumi. Inuussutissarsiutinut ilinniarnerni tunngaviusuni ilinniartuunissamut atsiueqatigiilluni isumaqatigiissuteqartoqarsimassaaq imaluunniit ilinniartuunissamik isumaqatigiissut ilinniartup suliffiullu akornanni isumaqatigiissuteqarfigineqarsimassaaq. Inuussutissarsiutinut ilinniartitaanernut allanut suliamik misiliinissamik isumaqatigiissut atorneqassaaq suliamik misiliisarnissaq ilinniartitaanermut ilaappat. Suliffimmi sungiusarluni ilinniartitaaneq tamakkiisumik ilaannakortumilluunniit atuarfimmi suliamik misiliinertut ingerlanneqarsinnaavoq, tak. 11, imm. 3.
Imm. 2. Suliffimmi sungiusarluni ilinniartitaaneq nunami allami sulinertut ilusilerlugu ingerlanneqartoq imm. 1 naapertorlugu suliffimmi sungiusarluni ilinniartitaanermut nallersuunneqarsinnaassanersoq qitiusumik ilinniartitaanermut ataatsimiititaliap aalajangiiffigisinnaavaa.

27. Suliffimmi sungiusarluni ilinniartitaaneq suliamik misiliinissanut pilersaarutit qitiusumik ilinniartitaanermut ataatsimiititaliap aalajangersagai malillugit qitiusumik ilinniarfinnit aalajangikkat malillugit ingerlanneqassaaq.
Imm. 2. Suliamik misiliinissanut pilersaarutini taaneqassapput ilinniakkap siunertaa taannalu tunngavigalugu allaaserineqassallutik suliassaqarfiit ingerlataqarfissallu suliffimmi sungiusarluni ilinniartitaanermut ilaatinneqartussat. Pilersaarutit ima imaqassapput qularnaarneqarsimassalluni atuarfimmi ilinniartitaaneq aamma suliffimmi sungiusarluni ilinniartitaaneq imminnut tapertariissillugit atorluarsinnaassallutik. Atuarfiup, ilinniartup suliffiullu akornanni attaveqatigiinnissamut maleruagassat imarissavaat.
Imm. 3. Suliffimmi sungiusarluni ilinniartitaaneq pillugu maleruagassanik erseqqinnerusunik Naalakkersuisut aalajangersaasinnaapput.

 

Ilinniartunik naliliineq, misilitsinnerit allagartartaarnissamullu misilitsinnerit

28. Ilinniartut ilinniarnermik naammassinninnerminnut uppernarsaammik tunineqassapput, tassunga ilanngullugit atuarfimmi ilinniartitaanerup naammassineqarneranut aamma suliffimmi sungiusarluni ilinniartitaanerup naammassineqarneranut uppernarsaatit. Ilinniartut ilinniarnerminnik unitsitsisut ilinniartitaanerup ilaanut naammassisimasaminnut uppernarsaataasinnaasumik tunineqarnissaminnut pisinnaatitaapput.
Imm. 2. Soraarummeerneq aammalu ilinniakkani ataasiakkaani ilinniartitaanerup ingerlanerani ilinniartunik naliliisarneq aaqqissorneqassapput naliliisarnissamut pilersaarut tunngavigalugu. Allagartartaarnissamut misilitsinneqassatillugu qitiusumik ilinniartitaanermut ataatsimiititaliat malittarisassiaat naliliisarnissamut pilersaarutinut ilaatinneqassapput.
Imm. 3. Suliffimmi sungiusarluni ilinniartitaaneq misilitsinnikkut allagartartaarnermik naammassineqarnissaanik qitiusumik ilinniartitaanermut ataatsimiititaliat aalajangiisinnaapput.
Imm. 4. Naliliisarnissamut pilersaarutit nalinginnaasut pillugit maleruagassat aammalu uppernarsaatit ilusilersorneqarnissaat tunniunneqarnissaallu pillugit maleruagassat erseqqinnerusut Naalakkersuisunit aalajangersarneqarsinnaapput.

 

Kapitali 6.
Suliffiit suliamik misiliiffiit

29. Suliffimmi sungiusarfissat inuussutissarsiutinut atuarfinnit pissarsiarineqassapput, atuarfiillu suliffiit sungiusarfissat pissarsiariniarlugit suliffeqarfiit ornittarnissaannut pisussaapput.
Imm. 2. Suliffiit sungiusarfissat naammattumik amerlassusillit pissarsiarineqarnissaat siunertaralugu suleqatigiinnissamut paasissutissiissuteqartarnermillu aaqqissuussinerit pillugit maleruagassat qitiusumik ilinniartitaanermut ataatsimiititaliat inassuteqaateqareernerisigut Naalakkersuisunit aalajangersarneqarsinnaapput.

30. Suliffimmik akuersissuteqarneq pissaaq suliffimmi sungiusarnissamut pilersaarutit 27-mi aalajangersarneqartut naapertorlugit suliffiup suliffimmi sungiusarluni ilinniartitaanermik naammassinnissinnaanerata aammalu suliffiup ilinniartunik naammaginartumik ilinniartitsisinnaassusiata naliliivigineqarneri tunngavigalugit.
Imm. 2. Akuersissuteqarnissamik suliassat suliarineqarneri pillugit maleruagassat, tassunga ilanngullugu suliassanik suliarinninnissamut piffissaliussat pillugit maleruagassat, qitiusumik ilinniartitaanermut ataatsimiititaliat inassuteqaateqareernerisigut Naalakkersuisut aalajangersarsinnaavaat.

31. Suliffiup suliffimmi sungiusarluni ilinniarfiusinnaasutut 30 naapertorlugu akuerineqarsinnaannginnera pillugu aalajangiinerit Kultureqarnermut, Ilinniartitaanermut Ilisimatusarnermullu Pisortaqarfimmut suliassanngortinneqarsinnaapput.

 

Kapitali 7.
Ilinniartut inatsisitigut inissisimanerat

32. Inuussutissarsiutinut ilinniartitaanerup ingerlanneqarnissaanut piumasaqaataavoq ilinniartup aamma suliffiup ataatsip arlallilluunniit akornanni ilinniartuunissamut atsiueqatigiilluni isumaqatigiissuteqartoqarsimanissaa imaluunniit ilinniartuunissamik isumaqatigiissuteqartoqarsimanissaa. Isumaqatigiissummut ilaassapput ilinniartitaanerup suliamik misiliinermut tunngasortaa atuarfimmiinnertaalu tamarmik, tassunga ilanngullugu allagartartaarnissamut misilitsissinnaaneq.
Imm. 2. Isumaqatigiissummi suliffiit arlallit akuutinneqarpata isumaqatigiissummi atuarneqarsinnaassaaq atuarfimmiinnerit suliamillu misiliiffiit suut suliffiit ataasiakkaat akuuffigineraat.
Imm. 3. Suliffik isumaqatigiissuteqarnikkut imminut pisussaatissinnaavoq ilinniartup ilinniarnerata ilaa suliffimmi allami ingerlanneqarsinnaasoq.
Imm. 4. Ilinniartitaanerit Naalakkersuisunit akuerineqarsimasut ilinniartuunissamut atsiueqatigiilluni isumaqatigiissuteqaqqaarnissamik imaluunniit ilinniartuunissamik isumaqatigiissuteqaqqaarnissamik piumasaqaateqarfiunngitsut aammalu atuarfimmi suliffimmi sungiusarluni aaqqissuussinermi ilaatinneqartut imm. 1-3-mi pineqartunut ilaanngillat.

33. Ilinniarneq naammassineqassappat ilinniartoq atuarfimmi ilinniartitsinermi atuarfiup pineqartup ilinniartitaanermut maleruagassat aalajangigai naapertorlugit ilinniartitsinermut peqataasimasariaqarpoq.
Imm. 2. Ilinniartut atuarfimmut aggeqquneqarnissaanni periusissat pillugit maleruagassat Naalakkersuisut aalajangersarsinnaavaat.
Imm. 3. Ilinniartut ineqartitaanissaat pillugu maleruagassanik Naalakkersuisut aalajangersaasinnaapput. Kommunit ilinniartunut ineqarfiutaat pillugit maleruagassat KANUKOKA-mut isumaqatigiissuteqaqqaarluni aatsaat aalajangersarneqassapput.

34. Ilinniartut atuarfimmi ilinniartitsinermut takkutinngitsut imaluunniit atuarfiup ileqqorissaarnermut maleruagassaanik sakkortuumik unioqqutitsisut, pillaanerit sakkukitsut iluaqutaasimanngippata, ilinniartitsinermi malinnaasinneqarnerminnit mattunneqarsinnaapput.
Imm. 2. Pinngitsoorani atuartussaanermut mattussinermullu aammalu mattussinissaq pillugu suliassat suliarineqarnissaannut maleruagassat erseqqinnerusut Naalakkersuisunit aalajangersarneqarsinnaapput.

35. Ilinniartuunissamut atsiueqatigiilluni isumaqatigiissut ilinniartuunissamillu isumaqatigiissut allaganngorsimassapput atsiorneqarsimassallutillu kingusinnerpaamik isumaqatigiissuteqarfiusup aallartinnerani. Isumaqatigiissut immersugassami qitiusumik ilinniartitaanermut ataatsimiititalianut peqatigiiffinnullu pisussaasunut tusarniaareernermi Kultureqarnermut, Ilinniartitaanermut Ilisimatusarnermullu Pisortaqarfimmit akuersissutigineqarsimasumi isumaqatigiissutigineqassaaq.
Imm. 2. Immersugassap isumaqatigiissutitut imarisaanik allanngortitsisoqarsinnaananilu ilassusiisoqarsinnaanngilaq Kultureqarnermut, Ilinniartitaanermut Ilisimatusarnermullu Pisortaqarfik akuersissuteqaqqaartinnagu.
Imm. 3. Ilinniartuunissamut atsiueqatigiilluni isumaqatigiissummi ilinniartuunissamillu isu-maqatigiissummi taaneqarsimassapput ilinniartup suliffimmi sungiusarluni ilinniartuunermi nalaani akissarsiarisinnaasai.
Imm. 4. Ilinniartuunissamut atsiueqatigiilluni isumaqatigiissutip ilinniartuunissamillu isumaqatigiissutip imarisassaat nalunaarsorneqarnissaallu pillugit maleruagassanik erseqqinnerusunik Naalakkersuisut aalajangersaasinnaapput.

36. Suliffimmi sungiusarnerit inuussutissarsiutinut ilinniartitaanermut sulisitsisut akiliutaat pillugit Inatsisartut inatsisaanni pineqartunut ilaasut eqqaassanngikkaanni ilinniartoq inuussutissarsiutinut ilinniartitaanerup suliffimmi sungiusarnertaanik isumaqatigiissutit atuuttut naapertorlugit suliamik misiliinermi akissarsiaqarsinnaatitaavoq aammalu ilinniagaqarnersiutit pillugit Inatsisartut peqqussutaat naapertorlugu immikkut tapiissutisisinnaatitaalluni. Suliffik sungiusarfik ataatsimoorussamik isumaqatigiissuteqarfiusunut ilaanngippat ilinniartoq minnerpaamik pisortat sulisitsisuini, ataatsimoorussamik isumaqatigiissuteqarfiusunut ilaasumi, ilinniartup akissarsiaqarnikkut sulinikkullu atugassarisaasa assinginik atugassaqartitaassaaq.
Imm. 2. Atuarfimmiinnerit inuussutissarsiutinut ilinniartitaanernut sulisitsisut akiliutaat pil-lugit Inatsisartut inatsisaanni pineqartunut ilaasut eqqaassanngikkaanni ilinniartoq inuussutissarsiutinut ilinniartitaanerup atuarfimmiinnertaani ilinniagaqarnersiutit pillugit Inatsisartut peqqussutaat naapertorlugu ilinniagaqarnersiuteqarsinnaatitaavoq.

37. Piffissami isumaqatigiissuteqarfiusumi sulisut ataatsimoorussamik isumaqatigiissutitigut imaluunniit inatsisiliornikkut atorfeqartitaanermut sulinermullu il.il. atugassarisaattut aa-lajangersakkat atuutissapput Inatsisartut peqqussutaanni matumani ilinniartitaanermut pineqartumut naapertuukkunik.
Imm. 2. Sulisitsisup qaqutiguinnaq ilinniartoq suliakkersinnaavaa ilinniakkamut tunngassuteqanngitsumik, kiisalu aatsaat ilinniartitsinermi siunertarineqartoq anguneqarsinnaassappat.

38. Ilinniartut ilinniagarisimasatik suliffigisimasatilluuniit pissutigalugit ilinniartuunissamik isumaqatigiissuteqarfiusumi imaluuniit ilinniarnissamik isumaqatigiissuteqarfiusumi ilinniarnissamut immikkut piginnaaneqartut isumaqatigiissuteqarnerup nalaani, kingusinnerusukkulluuniit, piffissap ilinniarfiusussap sivikillineqarnissaanik qitiusumik ilinniartitaanermut ataatsimiititaliat aalajangiisinnaapput.

39. Piffissap ilinniartuuffiup sivitsorneqarnissaa ilinniartup suliffiullu isumaqatigiissutigisinnaavaat ilinniartoq
1) napparsimaneq pissutigalugu piffissap ilinniartuuffiusussap 10 procentia sinnerlugu suliffimmi suliffimmi sungiusarluni ilinniarnerminik ingerlatsisinnaasimanngippat,
2) tapertaasumik atuarfimmi ilinniarneq pissutigalugu suliffimmi ingerlatsisinnaasimanngippat,
3) sulinngiffeqarallarsimappat imaluunniit naartunermut atatillugu erninermi sulinngiffeqarallarsimappat, ernineq meeravissiartaarnerluunniit pillugit inatsisit malillugit sulinngiffeqarallarsimappat imaluunniit
4) immikkut pissuteqarluni sivikinnerusumik suliffeqarpat imaluunniit sulinngiffeqarallarpat.
Imm. 2. Imm. 1 malillugu isumaqatigiissuteqarnerup sulinngikkallarnermit sivisunerusumik piffissap ilinniartuuffissap sivitsorneqarnissaa kingunerissappagu isumaqatigiissut aatsaat atorsinnaavoq qitiusumik ilinniartitaanermut ataatsimiititaliamit akuersissutigineqaruni.
Imm. 3. Imm. 1-imi taaneqartutut sulinngikkallarneq pissutigalugu sivitsuinissaq ilinniartup suliffiullu akornanni isumaqatigiinngissutaappat illuatungeriit arlaata piumasaqareerneratigut piffissaq ilinniartuuffissaq ataatsimiititaliap aalajangigaatut sivisussusilimmik qitiusumik ilinniartitaanermut ataatsimiititaliamit sivitsorneqarsinnaavoq.

40. Paragraffini 38-39 taaneqartut avataatigut pisuni immikkut ittuni piffissaq ilinniartuuffissaq sivikillineqassanersoq sivitsorneqassanersorluunniit qitiusumik ilinniartitaanermut ataatsimiititaliamit aalajangiiffigineqarsinnaavoq.

41. Ilinniartuunissamut atsiueqatigiilluni isumaqatigiissut aamma ilinniartuunissamik isu-maqatigiissut isumaqatigiissuteqarnermi illuatungeriinnit atorunnaarsinneqarsinnaanngilaq.
Imm. 2. Taamaattoq suliffimmi sungiusarnerup qaammatai pingasut siulliit piffissatut misiliiffittut isigineqassapput, taassuma iluani illuatungeriit arlaata kialluunniit patsisaasoq taanagu aammalu piffissaliinani isumaqatigiissut atorunnaarsissinnaavaa. Atuarfimmiinneq piffissaq misiliiffimmut ilaatinneqanngilaq.
Imm. 3. Ilinniartoq 39-mi imm. 1-imi taaneqartunik patsiseqarluni suliffimmi sungiusarluni ilinniartuuffimmi piffissami sungiusarfimmi qaammat ataaseq sinnerlugu sulinngippat piffissaq sungiusarfik sulinnginnertut sivisutigisumik sivitsorneqassaaq.

42. Isumaqatigiissummi pisussaaffiit illuatungeriit arlaata annertuumik sumiginnarpagit illuatungiusup aappaata isumaqatigiissut atorunnaarsissinnaavaa.
Imm. 2. Isumaqatigiissuteqarnermi tunngavigineqartup pingaaruteqartup eqqunngitsuunera paasinarsippat imaluunniit atorsinnaajunnaarpat illuatungiusup isumaqatigiissut atorunnaarsissinnaavaa.
Imm. 3. Imm. 1 imaluuniit imm. 2 malillugit atorunnaarsitsineq pissaaq atorunnaarsitsinermut patsisaasup atorunnaarsitsisumit paasineqarneraniit imaluunniit nalinginnaasumik misissorluarnermigut paasisaqareersimanissaanit qaammatip ataatsip iluani.
Imm. 4. Ilinniartup tapertaasumik atuarfimmi ilinniarnermik ingerlatsinera atorunnaarsitsinissamut patsisaasinnaanngilaq.

43. Ilinniartoq atuarfimmi ilinniartitsinermit mattunneqarpat, tak. 34, ilinniartuunissamut atsiueqatigiilluni isumaqatigiissut imaluunniit ilinniartuunissamik isumaqatigiissut atorunnaarsinneqassaaq.

44. Ilinniartup aamma suliffiup sungiusarfiup akornanni saqitsaassutaasoq qitiusumik ilinniartitaanermut ataatsimiititaliamut isumaqatigiissaaniartussamut saqqummiunneqarsinnaavoq.
Imm. 2. Taarsiissuteqartoqarnissaanik piumasaqaataasinnaasoq taamaallaat eqqartuussivimmit aalajangiiffigineqarsinnaavoq. Isumaqatigiissuteqartoqanngippalli qitiusumik ilinniartitaanermut ataatsimiititaliat aalajangiisinnaavoq. Aningaasarsiat atorfeqarnermullu atugassarititat aalajangersorneqassapput isumaqatigiissutit atuuttut naapertorlugit.

45. Ilinniartut atuarfimmiinnerminni, ilinniartuunissamut atsiueqatigiilluni isumaqatigiissummut imaluunniit ilinniartuunissamik isumaqatigiissummut ilaasumik, sulisilluni ajoquseriataarsinnaanissamut sillimmasiinermik aaqqissuussinermut ilaatinneqarput sulisilluni ajoquseriataarsinnaaneq pillugu inatsit malillugu suliffimmi sungiusarnerup nalaanut atuuttumi.
Imm. 2. Ilinniartut atuarfimmi suliffimmi sungiusarnerup nalaani imaluunniit allatut atuarfimmiinnermi imm. 1-imi taaneqartut saniatigut ajoquseriataarneri eqqarsaatigalugit sulisilluni ajoquseriataarsinnaanermut sillimmasiineq pillugu inatsit aamma atuuppoq ajoquserneq suliffimmi pissutsinut assingusumik ilinniartitsinermi pisimappat. Taamatut ajoqusernernut akisussaaffik Namminersornerullutik Oqartussat tigummiarpaat.

46. Ilinniartut suliffiillu inatsisilerinikkut inissisimanerat pillugu maleruagassanik erseqqinnerusunik Naalakkersuisut aalajangersaasinnaapput.

 

Kapitali 8.
Inuussutissarsiutinut ilinniartitaanermi pikkorissarnerit

47. Aningaasanut Inatsimmi aningaasaliissutaasunit suliamik ilinniagaqarsimasut suliamillu ilinniagaqarsimanngitsut, ilanngullugit suliffissaaleqisut, pikkorissartitaanerinut ilinniartitaaqqinnerannullu aningaasartuutinut matussutissanik tapiissuteqartoqartassaaq.
Imm. 2. Pikkorissartitsinerit Kalaallit Nunaanni inuussutissarsiutinut atuarfinnit isumagineqassapput tamanullu ammasumik neqeroorutigineqassallutik.
Imm. 3. Taamaattoq pikkorissartitsinerni Kalaallit Nunaanni inuussutissarsiutinut atuarfinnit neqeroorutigineqanngitsuni inuit ataasiakkaat peqataaneri tapiiffigineqarsinnaapput.

48. Atuarfik inuussutissarsiutinut ilinniartitaanernik neqerooruteqartoq peqataanermut aki-liutissanik akileeqqusisinnaavoq.
Imm. 2. Inuussutissarsiutinut pikkorissartitaanernut peqataasut akiliutissaat pillugit maleruagassat Naalakkersuisut aalajangersarsinnaavaat.

49. Pikkorissarnerit tapiissuteqarfigineqarsinnaasut siunertaat, tapiissutisitinneqarnissamut piumasaqaatit, tapiissutit annertussusissaat tunniunneqarnissaallu pillugit maleruagassat, aammalu nalinginnaasumik pikkorissartitsinernut maleruagassat, Naalakkersuisut aalajangersarsinnaavaat.

 

Kapitali 9.
Aalajangersakkat assigiinngitsut

50. Inatsisartut peqqussutaanni matumani maleruagassat atuutinngillat Inatsisartut peqqussutaatigut allakkut ilinniartitaanerit pineqartut pillugit maleruagassanik aalajangersaasoqarsimappat.

51. Misiliilluni aaqqissuussinernut atatillugu Inatsisartut peqqussutaat manna immikkut pi-suni Naalakkersuisunit sanioqqunneqarsinnaavoq.

52. Inatsisartut peqqussutaat manna malillugu aalajangiinerit tiguneqarnermik kingorna sap. akunneri 4 qaangiutsinnagit Naalakkersuisunut imaluunniit naammagittaalliuuteqartarfimmut Naalakkersuisunit piginnaatinneqartumut naammagittaalliuutigineqarsinnaapput.
Imm. 2. Naammagittaalliuuteqartarfissat, tassunga ilanngullugit naammagittaalliuuteqarsinnaanermut killiliussat aammalu naammagittaalliuutit pillugit periusissat, pillugit maleruagassat Naalakkersuisut aalajangersarsinnaavaat.

53. Inuussutissarsiutinut ilinniartitaanerit taakkuluunniit ilaasa kommuninit aningaasalersueqataaffigineqarnissaat pillugu maleruagassat KANUKOKA-mik isumaqatigiinniuteqareernikkut Naalakkersuisut aalajangersassavaat.

 

Kapitali 10.
Atortuulersitsinermi atorunnaarsitsinermilu aalajangersakkat

54. Inatsisartut peqqussutaat atortuulerpoq ulloq 1. august 1999. Peqatigitillugu atorunnaarsinneqarput
1) Kalaallit Nunaanni inuussutissarsiutinut ilinniagaqartut suliffimmilu sungiusarnermi sulliviit akornanni pisussaaffiit pillugit Inatsisartut inatsisaat nr. 4, 23. april 1988-imeersoq,
2) Inuussutissarsiutinut ilinniartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugit Inatsisartut peqqussutaat nr. 16, 28. oktober 1993-imeersoq,
3) Siamasissumik tunngaviusumik inuussutissarsiutinut ilinniartitaaneq pillugu Namminersornerullutik Oqartussat nalunaarutaat nr. 2, 19. januar 1988-imeersoq aamma
4) Inuussutissarsiutinik ilinniaqqaatissanik Kalaallit Nunaanni ilinniartitaanermi niuernermi allaffimmilu suliassanik ilinniagaqarneq pillugu nalunaarut nr. 134, 20. marts 1979-imeersoq.
Imm. 2. Allaffissornikkut aalajangersakkat
1) Kalaallit Nunaanni inuussutissarsiutinut ilinniartitaaneq, ilinniagaqarnermut tapiissutit, inuussutissarsiutinullu tunngasunik siunnersuineq Inatsisartut peqqussutaat nr. 4, 24. oktober 1980-imeersoq.
2) Kalaallit Nunaanni inuussutissarsiutinut ilinniagaqartut suliffinnilu sungiusarnermi sulliviit akornanni pisussaaffiit pillugit Inatsisartut inatsisaat nr. 4, 23. april 1988-imeersoq,
3) Inuussutissarsiutinut ilinniartitaaneq, ilinniagaqartunut tapiissutit inuussutissarsiutinullu tunngasunik ilitsersuisarneq pillugit Inatsisartut peqqussutaat nr. 2, 16. november 1984-imeersoq,
4) Inuussutissarsiutinut ilinniartitaaneq, ilinniagaqarnermut tapiissutit, inuussutissarsiutinullu tunngasunik siunnersuineq pillugit Inatsisartut peqqussutaat nr. 1, 4. maj 1990-imeersoq aamma
5) Inuussutissarsiutinut ilinniartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugit Inatsisartut peqqussutaat nr. 16, 28. oktober 1993-imeersoq naapertorlugit aalajangersagaasimasut atuutiinnassapput allanngortinneqarnissamik imaluunniit atorunnaarsinneqarnissamik tungaanut. 




Namminersornerullutik Oqartussat, ulloq 31. maj 1999.




Jonathan Motzfeldt

/

Lise Lennert