Peqqissaasutut ilinniartitaaneq pillugu Inatsisartut peqqussutaat nr. 7, 29. oktober 1999-imeersoq.

Inuutissarsiutinik ilinniartitsisarnermik Kalaallit Nunaannut inatsimmi nr. 582-imi, 29. november 1978-imeersumi, 1 naapertorlugu aalajangersarneqarpoq:

 

1. Peqqissaasutut ilinniartitaanikkut peqqissaasutut sulisinnaatitaanermut akuersissummik pigisaqalernissaq anguniarneqassaaq.
Imm. 2. Peqqissaasutut ilinnniartitaaneq Peqqissaanermik Ilinniarfimmit isumagineqarpoq.

2. Peqqissaasutut ilinniartitaanermut tiguneqarsinnaassagaanni piumasaqaataapput:
1) qinnuteqartoq ilinniarnertuunngorniarfimmi angusisimassasoq minnerpaamik 7-imik angusaqarluni fagini ukunani: tuluttut, fysik/kemi aamma psykologi imaluunniit inuiaqatigiilerinermi qaffasissuseq C, matematik qaffasissuseq B-imi, imaluunniit
2) qinnuteqartoq kalaallisoornermi imaluunniit qallunaatoornermi angusisimassasoq kiisalu fagit nr. 1-imi taaneqartut ataasiakkaatut sammillugit minnerpaamik 7-imik angusaqarfigisimassallugit qaammatini qulingiluani inuussutissarsiornikkut misilittakkanik ilallugit, imaluunniit
3) qinnuteqartoq allamik atuagarsornermik imalimmik Peqqissaanermik Ilinniarfiup pisortaanit akuerineqarsimasumik ilinniagaqarsimassasoq.

3. Ilinniartitaaneq kikkunnulluunniit 2 naapertorlugu piumasaqaatinik naammassinnissimasunut ammavoq.
Imm. 2. Ilinniartut inissaat, ilinniartitsisut il.il. amigaataatillugit ilinniartunngortussat killilerneqarnissaat pillugit naalakkersuisut malittarisassiorsinnaapput.

4. Ilinniarneq ukiunik sisamanik sivisussuseqarpoq pingasunillu immikkoortortaqarluni.
Imm. 2. Ilinniarnerup immikkoortuisa pingajuat angusiffigalugu naammassigaanni peqqissaasutut ilinniarsimanermut uppernarsaat misilitsinnermi angusat nalunaarlugit qanorlu qaffasitsiginerannut naliliineq Peqqissaanermik Ilinniarfiup tunniutissavaa.

5. Ilinniartitaanerup annertussusilersorneqarnera, aaqqissuunneqarnera, siunertaa, atuagarsornerup suliamillu misiliinerup kiisalu naliliisarnerit misilitsittarnerillu pillugu aalajangersakkanik Naalakkersuisut aalajangersaassapput.

6. Ilinniartitaanermut Pisortaqarfik ilinniartitaanermut siunnersuisoqatigiiliussaaq inunnik peqqinnissamut ilinniartitaanermullu tunnngasunik ilisimasaqartunik inuttalimmik.
Imm. 2. Siunnersuisoqatiigiit katitigaanerat, piginnaatitaaffii suliassaalu pillugit Naalakkersuisut malittarisassiussapput.

7. Inatsisartut peqqussutaat 1. januar 2000 atuutilerpoq.
Imm. 2. Tamatuma peqatigisaanik Napparsimasunik paarsisutut peqqinnissamullu ikiortitut ilinniartitaanerit pillugit Inatsisartut peqqussutaat nr. 9, 13. maj 1993-imeersoq atorunnaarsinneqarpoq.
Imm. 3. Napparsimasunik paarsisutut peqqinnissamullu ikiortitut ilinniartitaanerit pillugit Inatsisartut peqqussutaat nr. 9, 13. maj 1993-imeersoq naapertorlugu malittarisassiat atuutiinnassapput allanngortinneqarnissamik Inatsisartulluunniit peqqussutaanni matumani tunngavilimmik malittarisassiornikkut atorunnaarsinneqarnissamik tungaannut.




Namminersornerullutik Oqartussat, ulloq 29. oktober 1999.




Jonathan Motzfeldt

/

Lise Lennert