Suliffeqarfimmi piginnaanngorsaaqqinnermi akissarsianut tapiissutit, piginnaanngorsaaqqinnermut pilersaarut, piginnaanngorsaaqqinnermi ikiorsiissutit aamma eqaannerusumik suliffeqarneq pillugit Namminersornerullutik Oqartussat nalunaarutaat nr. 40, 13. december 2001-imeersoq.

 

Piginnaanngorsaaqqinnissamut ikiorsiisarneq pillugu Inatsisartut peqqussutaanni nr. 4, 31. maj 2001-imeersumi 9, imm. 2, 12, 14 aamma 17 naapertorlugit aalajangersarneqarput:

 

Suliffeqarfimmi piginnaanngorsaaqqinneq

1. Piginnaanngorsaqqittumik suliffeqarfimmi sungiusaanermi ilinniartitsinermilu suliffeqarfik akissarsiaqartitsissaaq, piginnaanngorsaqqittup suliffeqarfimmi sulineranut naleqqiullugu tiiminut suliffiinut naapertuuttumik.
Imm. 2. Akissarsianut aningaasartuutit 20%-iisa 80%-iisalu akornanni annertussuseqartut kommunip suliffeqarfimmut utertillugit akilissavai. Piginnaanngorsaqqittup sulisinnaassusia utertillugit akiligassanik annertussusiliinermi apeqqutaavoq aalajangerneqartassallunilu sivikinnerpaamik sapaatip akunneri sisamakkaarlugit. Suliffeqarfimmi piginnaanngorsaaqqinneq aallartitsinnagu kommunip suliffeqarfiullu akornanni erseqqinnerusumik isumaqatigiissusiortoqarsimassaaq.
Imm. 3. Piginnaanngorsaqqittup sulisinnaassusia nalilerneqassaaq inuup atugassarititaasut nalinginnaasut tunngavigalugit assigusumi suliffimmi atorfinitsitaasimasup sulinermi pisinnaassusianut naleqqiullugu.

 

Piginnaanngorsaaqqinnermut pilersaarut

2. Piginnaanngorsaaqqinnermut pilersaarutip suliarineqarnissaanut atorneqassapput paasissutissat qinnuteqartup peqqissutsikkut atugarisaanut, ilinniagaqarsimaneranut, inuussutissarsiutigisimasaanut inooqataanermilu atugarisaanut tunngasut.
Imm. 2. Piginnaanngorsaaqqinnermut pilersaarut kommunip oqartussaasoqarfiit assigiinngitsunik suliallit suleqatigiiffiannut saqqummiussinnaavaa.

3. Piginnaanngorsaaqqinnermut pilersaarut neqeroorutinik imaqassaq
1) ilinniagaqarnissamut imaluunniit qaffasinnerusumik ilinniagaqarnissamut ikiorsiinissamik, imaluunniit
2) allamik suliaqalernissamut suliamut allamut ilinniarnissamik, imaluunniit
3) sungiusarneqarnissamik innarluutigisimasinnaasat kingunerisaannut imaluunniit ajoqusernerit kingunerisaannut ikiuutaasinnaasumik.
Imm. 2. Piginnaanngorsaaqqinnermut pilersaarutip piginnaanngorsaaqqinnerup siunertaa paasinarsisissavaa.
Imm. 3. Piginnaanngorsaaqqinnermut pilersaarutip naammassinissaanut piumasaqaatit ataasiakkaanut tamanulluunniit tunngasut allanngorpata kommunip pilersaarut iluarsaatissavaa.

4. Piginnaanngorsaqqittoq eqeersimaarluni piginnaanngorsaaqqinnermut pilersaarutip naammassinissaanut peqataassaaq, tamanna tamatumaluunniit ilaa najugaqarfigisap avataani pissangaluarpalluunniit, imaassimanngippat tamanna inuttut ilaqutariittulluunniit atugarisanut tunngatillugu qularnanngitsumik naleqqutinngitsoq.
Imm. 2. Najugaqarfigisaq imm. 1-imi taaneqartoq tassaavoq sumiiffik piginnaanngorsaaqqinnermut pilersaarutip suliarineqarnerani piginnaanngorsaqqittup najugaqarfigisaa imaluunniit piginnaanngorsaqqittup nunassiffissamisut toqqagaa.

 

Piginnaanngorsaaqqinnermi aningaasatigut ikiorsiissutit

5. Kommuni piginnaanngorsaaqqinnermi aningaasatigut ikiorsiissaaq piginnaanngorsaaqqinnermut pilersaarut malillugu piginnaanngorsaqqittup aallartinneraniit tunniussisassallunilu piginnaanngorsaqqittup piginnaanngorsaaqqinnermut pilersaarummik malinninnerata nalaani.
Imm. 2. Piginnaanngorsaqqittoq piginnaanngorsaaqqinnermut pilersaarummik malinnittutut isigineqassaaq piginnaanngorsaaqqinnermut pilersaarutip anguniagaanut imarisaanullu akornutaanngitsumik piginnaanngorsaaqqinnerup ingerlanera sivikitsumik unitsinneqartarsimagaluarpalluunniit.
Imm. 3. Piginnaanngorsaaqqinnermut ikiorsiissutit kommunip unitsissavai piginnaanngorsaaqqinneq naammassippat imaluunniit siusinnerusukkut, piginnaanngorsaaqqinneq taamaatinneqarpat

6. Piginnaanngorsaaqqinnermi aningaasatigut ikiorsiissutit, S.I.K.-p aamma Naalakkersuisut akornanni isumaqatigiissutit malillugit sulisartup ilinniagaqarsimanngitsup tiimimusiaasa minnerpaat 70%-iisut annertutigisunik tiimimut aalajangersimasumik annertussusilerlugit tunniunneqassapput.
Imm. 2. Ikiorsiissutit naatsorsorneqassapput tiimit piginnaanngorsaqqittup piginnaanngorsaqqinnermi peqataaffigisaasa amerlassusiat tunngavigalugu, annerpaamillu sap. akunneranut 40 tiimit tunngavigalugit. Piginnaanngorsaaqqinnermi aningaasatigut ikiorsiissutit ullut 14-ikkaarlugit kingumoortumik tunniunneqassapput.
Imm. 3. Imm. 1 naapertorlugu tiimimut akit annertussusaat ukiut tamaasa 1. april aamma 1. oktober aalajangersarneqartassapput. Naalakkersuisut aamma SIK-p akornanni isumaqatigiissut allannguuteqartillugu tiimimut akit annertussusaat Naalakkersuisunit sapinngisamik piaartumik tamanut saqqummiunneqassapput.

7. 6 tunngavigalugu piginnaanngorsaaqqinnermut aningaasatigut ikiorsiissutit kommunip appartissavai
1) inuutissarsiutigalugu sulinermi imaluunniit namminersorluni ingerlatsinermi ukiumut isertitanik kr. 28.000,00-iniit qummut sinneruttunik, imaluunniit
2) sillimmasiisimanermit imaluunniit soraarnerussutisiassanut aaqqissuussinernit ingerlaavartumik tigusartakkanik, ilanngullugit Sulisilluni ajoqusernerit kingunerisassaannut sillimmasiinissamik inatsisip Kalaallit Nunaanni atortuulersinneqarnissaanik peqqussut malillugu inuussutissarsiorsinnaassutsimik annaasaqarnermut taarsiissutinit ingerlaavartumik tigusartakkat.
Imm. 2. Taamaattoq isertitat imm. 1-imi nr. 2-mi taaneqartut aatsaat ilanngaataassapput inuussutissarsiutigalugu sulinermi aamma namminersorluni ingerlatsinermi isertitat piginnaanngorsaaqqinnermut aningaasatigut ikiorsiissutit ilanngullugit katillugit piginnaanngorsaaqqinnerup siorna piginnaanngorsaqqittup sulinikkut isertitarisimasaanit amerlaneruppata.
Imm. 3. Isertitat allat pissutigalugit piginnaanngorsaqqinnermut aningaasatigut ikiorsiissutit appartinneqassanngillat.

8. Ataasiaannartumik aningaasartuutinut pisariaqartunut peqqussummi 13, imm. 2 naapertorlugu kommunip aningaasartuutigisinnaasaattut isigineqarput pikkorissarnermut akiliut, atuakkat, immikkut suliffimmik aaqqissuussineq.

 

Eqaannerusumik suliffeqarneq

9. Eqaannerusumik suliffeqarnissamik kommuni neqerooruteqarsimappat akissarsiat sulinermilu atugassarititat allat, ilanngullugu piffissaq suliffissaq, suliaqarfimmut isumaqatigiissutit atuuttut aallaavigalugit aalajangersarneqassapput. Suliaqarfinni isumaqatigiissuteqarfiunngitsuni aallaavigineqassapput suliaqarfiit nallersuunneqarsinnaasut.
Imm. 2. Piffissaq tamakkerlugu eqaannerusumik suliffeqarnissamik kommuni neqerooruteqartussaatitaavoq, atorfeqartup piffissap ilaannaani atorfeqartitaanissani piumanerunngippagu.

 

Atortuulerfia

10. Nalunaarut manna ulloq 1. januar 2002 atortuulerpoq.




Namminersornerullutik Oqartussat, ulloq 13. december 2001




Ole Dorph

/

Martha S. Abelsen