Siusinaartumik pensionisiat inummullu tapit il.il. pillugit Namminersornerullutik Oqartussat nalunaarutaat nr. 41, 14. december 2001-imeersoq.

 

Pisortanit pensionisiat pillugit Inatsisartut peqqussutaanni nr. 10-mi 30. oktober 1998-imeersumi, Inatsisartut peqqussutaatigut nr. 12-ikkut, 12. november 2001-eersukkut allanngortinneqartumi 16, 20, 22, 25, imm. 4, 27, imm. 2, 29, imm. 5, 30, imm. 3, 31, imm. 4 aamma 38, imm. 2 naapertorlugit makku aalajangersarneqarput:

 

Siusinaartumik pensionisiaqalersitsineq

1. Inuit inuussutissarsiorsinnaassutsimikkut ataavartumik pisinnaasakillisimasut, tak. pisortanit pensionisiat pillugit Inatsisartut peqqussutaanni nr. 10-mi 30. oktober 1998-imeersumi 15 imm. 1, pisortanit siusinaartumik pensionisiaqalersinneqarsinnaapput, piginnaanngorsaaqqinnis-samut periarfissaarulluinnarsimappata.

2. Siusinaartumik pensionisiaqalernissamik qinnuteqaammik kommunalbestyrelsip suliarinnilernerani paasissutissat makku tiguneqareersimassapput:
1) nakorsap uppernarsaatitut allagartaliussaa, kommunalbestyrelsimit akilerneqartussaq,
2) suliffissarsiuussisarfiup uppernarsaatitut allagartaliussaa,
3) isumaginninnermut tunngasut pillugit nalunaarusiaq, matumani piginnaanngorsaaqqittoqarsimappat tamanna pillugu allaaserisaq ilanngullugu, aamma
4) oqartussaasoqarfiit assigiinngitsunik suliallit suleqatigiiffiata inassuteqaataa.
Imm. 2. Suliassani ataasiakkaani oqartussaasoqarfiit allat akuliuffigisimasaanni taakku oqaaseqaataasa pigineqarnissaat Kommunalbestyrelsip isumagissavaa.

 

Pensionisiat naatsorsorneqartarnerat iluarsineqartarnerallu

3. Pensioneqalersitsisoqartillugu pensioneqalernerup kingorna saniatigut isertitassatut naatsorsuutigisat tunuliaqutaralugit pensionisiap angissusissaa naatsorsorneqassaaq.
Imm. 2. Pensionisianik tunniussinermit siullermit ukiup tulliuttup naanissaata tungaanut, saniatigut akileraaruteqaataasussatut isertitarissangatitatut ukiumut ilivitsumut naatsorsuineq tunngavigalugu pensionisiat amerlassusilerlugit tunniunneqartassapput.
Imm. 3. Ukiup ataatsip ingerlanerani pensionisiat amerlassusii iluarsineqartillugit, tak. Inatsisartut peqqussutaanni nr. 10-mi 30. oktober 1998-imeersumi 29, imm. 2, naatsorsuisoqartassaaq allannguinerup kingorna pensionisiaqartup akileraaruteqaataasussatut saniatigut isertitarissangasai tunngavigalugit.
Imm. 4. Katissimasunut aappariinnulluunniit katinnermut assingusumik inooqatigiittunut pensionisiat tunniunneqartartut amerlassusiisa iluarsineqarnerat pisassaaq aappariit marluullutik saniatigut isertitaat akileraaruteqaataasussat tunngavigalugit, tak. imm. 1-3.

4. Pensionisiaqartoq Kalaallit Nunaanni tamakkiisumik akileraartussaatitaanngippat pensionisiaqartup pisortanit pensionisiai ilanngunnagit ukiumut isertitai tamaasa ilanngullugit saniatigut isertitatut naatsorsuunneqassapput.
Imm. 2. Pensionisiaqartup Kalaallit Nunaanni tamakkiisumik akileraartussaatitaanngitsup oqartussaasup pensionisiaqalernissamik suliarinnittup piumasaqarnera naapertorlugu Kalaallit Nunaanni Kalaallit Nunaatalu avataani ukiumoortumik naatsorsuutit atorlugit isertitani uppernarsartassavai.

 

Napparsimmavimmi uninnganermi, ulloq unnuarlu paaqqinniffimmiinnermi imaluunniit
tigummigallagassanngortinneqarnermut atatillugu pensionisiat

5. Pensionisialik Inatsisartut peqqussutaanni nr. 10-mi 30. oktober 1998-imeersumi 31 naapertorlugu Kalaallit Nunaanni isumaginninnikkut ulloq unnuarlu paaqqinniffimmit allaanerusumut inissinneqarpat, Kalaallit Nunaanni imaluunniit Kalaallit Nunaata avataani napparsimmavissuarmut unitsinneqarpat, eqqartuussiviup aalajangiineratigut eqqarsartaatsikkut napparsimmavimmut inissinneqarpat, pinerluuteqarsimasunik isumaginnittoqarfimmit Kalaallit Nunaannut Danarkimulluunniit inissinneqarpat, imaluunniit eqqartuussiviup tigummineqarallartussanngortissimappagu pensionit allanguuteqartinnagit tunniunneqartassapput, pensionisiaqartoq katissimallugu aapparisaminut namminerluunniit meeqqaminut pilersuisussaatitaappat imaluunniit ineqarnermut aalajangersimasumik aningaasartuuteqarpat.
Imm. 2. Pensionisialik imm. 1-imi taaneqartutut aapparisaminut namminerluunniit meeqqaminut pilersuisussaatitaanngippat - qaammatit arfinillit uninngareernikkut inissinneqareernikkulluunniit - qaammatip tulliup aallaqqaataa aallarnerfigalugu pensionisiat 20%-ii tunniunneqartalissapput, tak. 3.
Imm. 3. Pensionisiaqartup angerlartinneqarnerata iperagaanerataluunniit kingorna qaammatip tulliup aallaqqaataa aallarnerfigalugu pensionisiat isertitaqqortussuseq tunngavigalugu iluarsineqarsimasut tunniunneqartalissapput.
Imm. 4. Pisortani oqartussat kaasarfimmiuliisimappata, akissarsiaqartitsisimappata imaluunniit suliassaqartitsinermut atatillugu aningaasarsiaqartitsisimappata taakku pensionisianit ilan-ngaatigineqassapput, taamaattorli pensionisiat aningaasartaasa ikinnerpaamik 20%-ii pensionisiaqartup tigussallugit, tak. 3.
Imm. 5. Meeqqanut tapinik pisinnaatitaaneq allannguuteqarani ingerlaannassaaq, taamatuttaarlu pensionisiaqartoq pisariaqartitsinini tunngavigalugu naliliiffigineqareerluni inummut tapinik pisinnaatitaassalluni, matumani ilanngullugit uninnganerup inissinneqarnerulluunniit nalaani inigisaq pigiinnarniarlugu aningaasartuutaasinnaasunut.

6. Tunniussisarnermi tunngavigineqartut allannguuteqarpata tamanna pensionisiaqartup kommunitut najugarivitarisimasaanut sullissiviup najugarineqartup nalunaarutigissallugu pisussaaffigaa.

 

Meeqqanut tapit

7. Pensionisiaqartoq peqqussummi 18 aamma 19 naapertorlugit meeqqanut tapinik tunineqartalerpat tapit taakku qaammatikkuutaartumik tunniunneqartassapput, meeqqanut akilersuutit nalinginnaasut, Inatsisartut Aningaasanut Inatsisaatigut ukiumoortumik aalajangersarneqartartut amerlaqataannik. Pilersuisut marluullutik pensionisiaqartuuppata pensionisiallit tamarmik immikkut meeqqanut tapinik tunineqartassapput.
Imm. 2. Tapit taakku qaammammoortumik tunniunneqartassapput, pensionisiaqartoq meeqqanut akilersuutinik akiliisarnermigut meeqqamut pilersuisuunngippat. Pensionisiaqartoq meeqqamut akilersuutinik akilersuisussanngortitaasimappat meeqqamut tapit ukiup affakkuutaartumik tunniunneqartassapput, piffissaq akiliiffiusartussaq allatut isumaqatigiissutigineqarsimanngippat aalajangersarneqarsimanngippalluunniit. Akilersuutit piffissamut ukiup affaanit sivikinnerusumut sivisunerusumulluunniit akilerneqartarpata tapit taakku piffissamut tassunga tigusassatut tunniunneqartassapput.
Imm. 3. Meeraq pineqartoq pensionisiaqartumi najugaqanngippat, pensionisiaqartorlu meeqqamut akilersuutinik akilersuisussanngortinneqarsimappat aningaasat taakku meeqqamut akilersuutinik tigusisinnaatitaasumut tunniunneqartassapput. Meeqqanut tapit meeqqamut toqqaannartumik tunniunneqarsinnaanngillat.

8. Inatsisartut peqqussutaat nr. 10, 30. oktober 1998-imeersumi 19 naapertorlugu meeqqanut tapinik tunniussisarunnaarneq atorunnaarniariarpat meeqqanut tapinik tunniussisarneq piaartumik aallarteqqinneqassaaq.

 

Inummut tapit

9. Pensionisiaqartup aningaasartuutinut aalajangersimasunut akiliisarnermigut aningaasaqarnikkut ajornartorsiulernissaa ulorianaateqarpat inuup taassuma pisariaqartitaanik naliliinikkut inummut tapit tunniunneqartarnissaat akuersissutigineqartassaaq.

10. Inuk pensionisiaqalersinneqarpat pineqartup atugai ataatsimut isigalugit kommunalbestyrelsip naliliiffigissavai, aningaasartuutinut aalajangersimasunut ingerlaavartunut matusissutissanik inummut tapiliisoqarnissaa pisariaqartinneqassanersoq paasiniarlugu. Taamatut naliliisoqartassaaq inummut tapinik qinnuteqaateqartoqarnera qinnuteqaateqartoqannginneraluunniit apeqqutaatinnagu, taamaaliornikkullu pensionisiaqartup ulluinnarni pisariaqartitaminut manna tikillugu inuunermi atugarisimasanut najukkamilu pissutsinut naapertuuttumik naleqquttunik aningaasaateqarnissaa qulakkeerniarlugu.
Imm. 2. Inummut tapit ingerlaavartumik tunniunneqartartut aningaasartuutinut aalajangersimasunut naleqquttumik amerlassuseqartunut matusissutaasartussatut pinermi ataatsimi sivisunerpaamik ukiumi ataatsimi akuersissutigineqarsinnaaput.

11. Inummut tapit ataasiaannartumik ikiorsiissutitut ataasiaannartumik aningaasartuutinut matusissutissatut tamakkiisumik ilaannakortumilluunniit akuersissutigineqarsinnaapput, soorlu isarussanut, atisanut, pequtinut, immikkut ittumik iluaqusersuutinut inigisallu pisariaqartumik iluarsaanneqarneranut.
Imm. 2. Kommunalbestyrelsip akiitsunut akiliutissanik inummut tapiliisoqarnissaa akuersissutigisinnaavaa, aningaasartuutinut ingerlaavartunut aalajangersimasunut akiitsut piffissami pensionisianik tunniussiviusarsimasumi akiliisinnaassuseqannginneq pissutigalugu pilersimappata.

12. Pensionisiaqartup inummut tapisitinneqarsinnaatitaaneranut apeqqut kommunalbestyrelsip naliliiffigeqqissavaa, paasiguniuk pissutsit pensionisiaqartup atugai allanngorsimasut.

13. Naak pensionisiaqartoq saniatigut isertitaqarnini pissutigalugu pisortanit pensionisianik tunineqartanngikkaluartoq inummut tapit akuersissutigineqarsinnaapput.
Imm. 2. Pensionisiaqartut isumaginninnermi ulloq unnuarlu paaqqinniffinniittut pensionisiaqartut angerlarsimaffimminni najugaqartut inummut tapinik tunineqartarneranni tunaartarisassat assingi atorlugit inummut tapisitinneqarnissaminnut pisinnaatitaaffeqarput.

 

Ilanngaassisarneq

14. Pensionisiat amerlanaarlugit tunniunneqarsimasut kommunalbestyrelsip ilanngaassissutigisinnaavai, pensionisiaqartup paasissutissanik qularnanngitsumik eqqunngitsunik tunniussaqarsimaneranik imaluunniit inuttut aningaasaqarnikkulluunniit atukkamini allannguutinik annertuunik nalunaaruteqarsimannginneranik amerlanaaraluni tunniussineq pissuteqarpat.
Imm. 2. Taamaattorli pensionit amerlanaarlugit tunniunneqartut ilanngaatigineqarnerat taamaallaat pisinnaavoq amerlanaarlugit tunniunneqartut annertusimappata.
Imm. 3. Inummut tapit tamakkiisumik ilanngaatigineqarsinnaapput, paasissutissat eqqortut tunniunneqarnerisigut inummut tapit tunniunneqarnissaat itigartitsissutigineqarsimasussaasimagaluarpata.

15. Pensionisiaqartoq aappaqarsimagunilu aappanilu pensionisiat saniatigut isertitaqanngippata pensionit aningaasartaannit akileraarutit ilanngaatigereerlugit qaammammoortumik tunniunneqartartunit annerpaamik 10%-it qaammammut ilanngaatigineqarsinnaapput. Kisianni pensionisiaqartoq aappaqarsimagunilu aappanilu pensionisiat saniatigut allanik isertitaqartarpata pensionit aningaasartaannit akileraarutit ilanngaatigereerlugit qaammammoortumik tunniunneqartartunit annerpaamik 15%-it qaammammut ilanngaatigineqarsinnaapput.

 

Nunat Avannarliit pensionisiaritittagaat

16. Isumaginninnermi isumannaallisaaneq pillugu Nunat Avannarliit isumaqatigiissutaat 15. juni 1992-imeersoq malillugu pensionisiaritinneqartartut Isumaginninnermut Pisortaqarfimmit pensionisiaqartumut toqqaannartumik tunniunneqartassapput, Kalaallit Nunaanni akileraaruteqaataasussat ilanngaatigereerlugit.
Imm. 2. Isertitaqqortussuseq tunngavigalugu aaqqiissuteqartarneq 3 - 4 malillugit pisassaaq, taamatuttaarlu ilanngaassisoqassappat 14 malillugu ilanngaassisoqarsinnaalluni.

 

Ilassutitut tunniunneqartartut

17. Ilassutitut immikkut tunniunneqartartunik tunineqartassapput inuit,
1) 1975-imi apriilip aallaqqaataanit tunngaviusumik aningaasartanik amerlisanik pisalersimasut, 65-inik ukioqalernermik kingorna aatsaat utoqqalinersiaqalernissaminnik qinnuteqaateqarsimanertik pissutigalugu, imaluunniit
2) 1975-imi apriilip aallaqqaataani 60-inik ukioqalereersimasut, aatsaallu 65-inik ukioqalernermik kingorna utoqqalinersiaqalernissaminnik qinnuteqaateqarsimasut.

18. Ilassutitut tunniunneqartartut utoqqalinersianut ilanngullugit tunniunneqartassapput, massakkullu kisermaanut aappariinnulluunniit aappaanna ilassutitut tunniunneqartartunik pisinnaatitaasunut ukiumut kr. 8.760-iupput, qaammammut kr. 730-iullutik. Aappariinnut marluullutik ilassutitut tunniunneqartartunik pisinnaatitaasunut ilassutitut tunniunneqartartut ukiumut kr. 13.128-iupput, qaammammut kr. 1.094-iullutik.

 

Naammagittaalliuuteqarsinnaaneq

19. Nalunaarut manna tunngavigalugu kommunip aalajangiineri isumaginnittoqarfiup aqunneqarnera aaqqissuussaaneralu pillugit inatsisartut peqqussutaanni aalajangersakkat malillugit Isumaginninnermi Naammagittaalliuuteqartarfimmut naammagittaalliuutigineqarsinnaapput.

 

Atortuulersitsineq

20. Nalunaarut manna ulloq 1. januar 2002 atortuulerpoq.
Imm. 2. Tamatumunnga peqatigitillugu atorunnaarsinneqarpoq Siusinaartumik pensionisiat, piginnaanngorsaaqqinnermik inummullu tapit il.il. pillugit Namminersornerullutik Oqartussat nalunaarutaat nr. 3, 10. januar 2000-imeersoq.




Namminersornerullutik Oqartussat, ulloq 14. december 2001




Ole Dorph

/

Martha Abelsen