Isumaginninnermut tunngasunik nakkutilliineq pillugu Namminersornerullutik Oqartussat nalunaarutaat nr. 43, 18. december 2001-imeersoq.

 

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11, 12. november 2001-imeersumi 1, imm. 2 malillugu aalajangersarneqarput makku:

 

Kommuninik nakkutilliineq

1. Isumaginninnikkut inatsisini maleruagassat kommunit eqquutsinneraat aammalu inatsisini ingerlatsinermut tunngassuteqartuni maleruagassat naapertorlugit ingerlanneraat Isumaginninnermut Suliffeqarnermullu Pisortaqarfiup nakkutigissavaa.
Imm. 2. Nakkutilliinermi pineqarput allaffissornikkut aqutsineq paaqqinniffiillu.

2. Nakkutilliisutut takusaanerit pisassapput kommunalbestyrelsimut qinigaaffiup iluani minnerpaamik ataasiartumik.
Imm. 2. Tamanna Isumaginninnermut Suliffeqarnermullu Pisortaqarfiup pisariaqarsorippagu nakkutilliineq imm. 1-imi taaneqartumit annertunerutinneqassaaq.

3. Nakkutilliisutut takusaanissat sivikinnerpaamik sap. akunnerinik marlunnik sioq-qutsisumik kommunalbestyrelsimut nalunaarutigineqassapput.

4. Nakkutilliisutut takusaanermi suliassaqarfiit immikkut toqqakkat iluini ilaatigut suliassanik aalajangersimasunik misissuisoqartassaaq. Misissorneqassaaq isumaginninnikkut inatsisini maleruagassiat naapertorlugit aalajangiisoqartarsimanersoq.

5. Nakkutilliisutut takusaanerit tamaasa Isumaginninnermut Suliffeqarnermullu Pisortaqarfik nakkutilliinermi nalunaarusiortassaaq. Nakkutilliinermi nalunaarusiaq kommunip aamma kommuninut Nakkutilliisoqarfiup tigussavaat. Tamanna sapinngisamik qaammatit marluk iluanni pissaaq.

 

Ulloq unnuarlu paaqqinniffinnik nakkutilliineq

6. Paaqqinniffinnik Namminersornerullutik Oqartussanit pigineqartunik ingerlanneqartunilluunniit nakkutilliineq oqartussaasoqarfiit assigiinngitsunik suliallit suleqatigiiffianit isumagineqassaaq.

7. Suleqatigiiffik isumaqaruni paaqqinniffimmi pissutsit naammaginanngitsuusut imaluunniit tulluartuunngitsut Isumaginninnermut Suliffeqarnermullu Pisortaqarfimmut saaffiginnissaaq.

8. Nalunaarut manna ulloq 1. januar 2002 atortuulerpoq.




Namminersornerullutik Oqartussat, ulloq 18. december 2001




Ole Dorph

/

Martha Abelsen