Nakorsaatit pissassaatitut atorneqartartut ilaasa inerteqqutaanerat pillugu Inatsisartut peqqussutaat nr. 7, 31. maj 2001-imeersoq.

 

Kalaallit Nunaanni Peqqinnissamik Isumaginnittoqarfik pillugu inatsimmi nr. 369-imi, 6. juni 1991-imeersumi 1 aamma 3 naapertorlugit aalajangersarneqarpoq:

 

1. Nakorsaatit pissassaatitut atorneqartartut ilaat makku Inatsisartut peqqussutaanni pineqarput:
1) Anabole steroidit.
2) Testosteronit taakkunanngalu suliaasunit (derivater), aammalu atortussianik assigisaannik (androgen) sunniuteqartut.
3) Hormonit alliartortitsissutit.
4) Erytropoietinit atortussallu qassinik ukioqarnermut suiaassutsimullu nalinginnaasumik pingaarutillit qaangerlugit aammi aap akui aappalaartut amerlassusiisa annertusineqarnissaannut sunniutaasartunut assingusut.
5) Atortussat makkunannga annertuumik pilersitsisut peersitsisulluunniit
a) hormonit alliartortitsisut.
b) testosteronit taakkunanngalu suliaasunit (derivater), aammalu atortussianik assigisaannik (androgen) sunniuteqartut imaluunniit.
c) erytropoietini akoqanngitsoq.

2. Nakorsaatit pissassaatitut atorneqartartut nakorsaatinut sorlernut allanut peqqussutip matuma atuunnissaanut Naalakkersuisut aalajangersagaliornissaminnut piginnaatinneqarput.

3. 1-imi aamma 2-mi nakorsaatit pissassaatitut atorneqartartut nakorsaatit pineqartut nakorsaasiarineqassanngillat, eqqunneqassanngillat, anninneqassanngillat, tuniniarneqassanngillat, tunniunneqassanngillat agguaanneqassanngillat pigineqaratilluunniit nappaammik pinaveersaartitsinermut katsorsaanermulluunniit atorneqarneri eqqaassanngikkaanni imaluunniit ilisimatusarnermik siunertaqarneq eqqaassanngikkaanni.
Imm. 2. Imm. 1-imi nappaammik pinaveersaartitsinermut katsorsaanermulluunniit atuineq inuinnaat eqqarsaatigalugit nakorsap nakorsaatinik atueqqusineratut pissaaq.
Imm. 3. Aalajangersakkami imm. 1 eqqarsaatigalugu immikkut ittumik akuersissuteqarneq Naalakkersuisunit nalunaarutigineqarsinnaavoq. Immikkut ittumik akuersissuteqarnissamut atugassarititanik erseqqinnerusunik Naalakkersuisut aalajangersagaliorsinnaapput.

4. 3, 1-imik unioqqutitsisoq imaluunniit 3, imm. 3-p aappaani atugassarititanik pineqartunik unioqqutitsisoq akiliisitaasussanngorlugu arsaarinniffigisassanngorlugu eqqartuunneqarsinnaavoq.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiilluni ingerlatseqatigiiffik assigisaalluunniit unioqqutitsisimasoq akiliisitaasussanngorlugu arsaarinniffisassanngorlugulu eqqartuunneqarsinnaavoq.

5. Inatsisartut peqqussutaat atuutilissaaq ulloq 1. juli 2001.




Namminersornerullutik Oqartussat, ulloq 31. maj 2001




Jonathan Motzfeldt

/

Alfred Jakobsen