Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaat nr. 11, 12. november 2001-imeersoq.

(Isertitat tamarmiusut tunngaviata, isumaginninnermi paaqqinnittarfinnut piniarnermut allagartat, sunngiffimmi piniarnermut aallaaniarnermullu akuersissutit, akiliisitsilluni piniartitsinermut akiliutit kiisalu piniarnermut allagartanik arsaarinnittarnermut malittarisassat allanngortinneqarneri)

 

1.

Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi makku allanngortinneqarput:

1. 4, imm. 2, nr. 4 imatut oqaasertalerneqassaaq:
"4) piniarnermit, aallaaniarnermit aalisarnermillu isertitaqartunut isertitat tamarmiusut ikinnerpaamik 50%-iinik. Angallatit angallatip uuttuutaanut uppernarsaat naapertorlugu 150 BRT-init imaluunniit 210 BT-init anginerusut atorlugit aalisarnermit isertitat tamarmiusut piniarnermit, aallaaniarnermit aalisarnermillu isertitat tamarmisut naatsorsuusiorneqarnerannut ilanngunneqassanngillat. Qinikkatut pisortanillu toqqakkatut suliassaqartitaanermit aningaasarsiat imaluunniit inuussutissarsiutigalugu piniartut kattuffiisa/peqatigiiffiisa siulersuisuini sulinermit aningaasarsiat, piniarnermit, aallaaniarnermit aalisarnermillu isertitat tamarmiusut naatsorsorneqarnerannut imaluunniit isertitat tamarmiusut naatsorsorneqarnerannut ilanngunneqassanngillat. Manna aalajangersagaq malillugu piniarnermit, aallaaniarnermit aalisarnermillu isertitat tamarmiusut naatsorsorneqarneranni isertitat tamarmiusut, akiliisitsilluni aallaaniartitsisarneq aalisartitsisarnerlu pillugit Namminersornerullutik Oqartussat nalunaarutaat malillugu akiliisitsilluni aallaaniartitsinermik aaqqissuussinermit imaluunniit akiliisitsilluni aallaaniartitsinermut atatillugu ilisimasortatut suliffeqarnermit pisut ilanngunneqassapput."

2. 4-p kingornanut ikkunneqassaaq:
" 4 a. Naalakkersuisut isumaginninnermi paaqqinnittarfimmut, paaqqinnittarfiup inunnik perorsaanerani piniarnermik aallaaniarnermillu periaatsitut atuisumut, inuussutissarsiutigalugu piniarnermut allagartamik tunniussinermut atatillugu 4, imm. 2, nr. 2-4-mi aalajangersakkat saneqqunneqarnissaannut akuersissuteqarsinnaapput. Aalajangersagaq una malillugu inuussutissarsiutigalugu allagartamik immikkut akuersissuteqar-nermi Naalakkersuisut uumasut aalajangersimasut aallaaniarneqarsinnaanerat killiliivigisinnaa-vaat mattussinnaalluguluunniit.
Imm. 2. Naalakkersuisut paaqqinnittarfik attuumassuteqartoq suleqatigalugu 8, imm. 1, aamma 12 - 13 naapertorlugit malittarisassianik malitsitsinissamut kina akisussaasuussanersoq tunaartarisassaliussapput."

3. 5-imi ikkunneqassaaq:
"Imm. 2. Imm. 1-mi aalajangersagaq apeqqutaatinnagu piniakkanik killilersugaasunik sunngiffimmi piniarnissamut aallaaniarnissamullu akuersissutit qinnuteqaateqartoqarneratigut tunniunneqarsinnaapput inunnut,
1) Kalaallit Nunaanni inuit nalunaarsorsimaffiannut nalunaarsimasunut aamma
2) ukiuni kingullerni qulini piffissaq qinnuteqarfik sioqqullugu ukiuni marlunni ataannartumik Kalaallit Nunaanni najugalittut inuit nalunaarsorsimaffianni nalunaarsorsimasunut."

4. 7, imm. 3 aamma 4 imatut oqaasertalerneqassapput:
"Imm. 3. Naalakkersuisut akuersissutit imm. 1-2-mi taaneqartut tunniunneqarnerannut atatillugu pisortanut akiliuteqaqqusinissaminnut piginnaatitaapput. Pisortanut akiliutit annertussusissaat Inatsisartunit inatsisartut inatsisaatigut aalajangersarneqassaaq.
Imm. 4. Naalakkersuisut imm. 1-2-imi akuersissutit taaneqartut tunniunneqartarnerat, pissarsiarineqartarnerat annaaneqartarnerallu pillugit erseqqinnerusunik maleruagassaliorsinnaapput."

5. 17-ip kingornanut ikkunneqassapput:
" 17 a. Maleruagassanik 17, imm. 1-2-mi taaneqartunik piaaraluni imaluunniit arlaleriarluni mianersuaalliorujussuarnikkut unioqqutitsisarsimasoq, piniarnermut allagartaajarneqarsinnaavoq allagartartaarsinnaajunnaartinneqarsinnaalluniluunniit, unioqqutitsisimaneranut atatillugu isumaqarsorinarpat pineqartoq siunissami illersorneqarsinnaasumik piniartarsinnaassanngitsoq. Tamannattaaq atuuppoq aallaaniartilluni piaaraluni imaluunniit arlaleriarluni mianersuaalliorujussuarnikkut inummik allamik ajoqusiisimasutut imaluunniit tamatumunnga navianartorsiortitsisimasutut pisuussuteqartumut.
Imm. 2 Piniarnermut allagartaqarsinnaajunnaarsitaasup, imaluunniit 6, imm. 1 aamma 7, imm. 4 malillugit piniarnermut allagartaajagaasup, piniarnermut allagartaq politiinut tunniutissavaa.
Imm. 3. Piniarnermut allagartaajagaaneq inaarutaasumik eqqartuunneqarnermiit ukiumit ataatsimiit tallimanut sivisussuseqarsinnaavoq, nutaamilluunniit aalajangiisoqarnissaata tungaanut. Allagartaajagaaneq nutaamik aalajangiisoqarnissaata tungaanut pisimappat, ukiut tallimat qaangiunneranni allagartaajakkap qinnuteqarneratigut arsaagaanerup ingerlaannarnissaa unnerluussisussaatitaasunit eqqartuussivinnut suliassanngortinneqarsinnaavoq. Aalajangiineq eqqartuussivimmi aalajangiinikkut pissaaq. Piniarnermut allagartartaarsinnaajunnaarsitsilluni aalajangiisoqarpat apeqqut eqqartuussivinnut suliassanngorteqqinneqarsinnaavoq, taamaattorli siusinnerpaamik ukiut marluk qaangiunneranni."

 

2.

Inatsisartut inatsisaat ulloq 1. december 2001-imi atuutilerpoq.




Namminersornerullutik Oqartussat, ulloq 12. november 2001




Jonathan Motzfeldt

/

Hans Enoksen

 


Nassuiaatit

Isumaliutissiissut allannguutissatut siunnersuutitalik