Aalisarneq pillugu Inatsisartut inatsisaata allanngortinneqarneranik Inatsisartut inatsisaat nr. 15, 12. november 2001-imeersoq.

(Inuussutissarsiutigalugu aalisartunut isertitat tamakkiisut pillugit piumasaqaatinik appartitsineq, sinerissap qanittuani aalisariutit pisassanit annerpaamik pigisinnaasaannik qaffaaneq, ukiumik pisassiiffigineqartartumik eqaannerusumik aaqqissuineq aammalu pisassat, pisat il.il. pillugit paasissutissanik avammut saqqummiisinnaanermut malittarisassat)

 

1.

Aalisarneq pillugu Inatsisartut inatsisaanni nr. 18, 31. oktober 1996-imeersumi kingullermillu inatsisartut inatsisaatigut nr. 6-ikkut 20. maj 1998-imeersukkut allanngortinneqartumi makku allanngortinneqarput:

1. 6, imm. 3-imi nr. 4 ima allanngortinneqassaaq:
"4) Inuit pineqartut tamarmik qaammatisiutit ukiuini kingullerni marlunni inuussutissarsiuti- galugu aalisartuusimassapput, ukiunilu kingullerni marlunni, toqqakkatut suliaqartitaanermit isertitat ilanngaatigereerlugit, isertitaasa tamarmiusut ikinnerpaamik 50 %-ii inuussutissarsiutigalugu aalisarnermit isertinneqarsimassapput. Inuussutissarsiutigalugu aalisartuunermut nallersuunneqarput piniartutut, savaatilittut, tuttuutilittut assigisaannillu inuussutissarsiuteqarnerit."

2. 15, imm. 4 ima allanngortinneqassaaq:
"Imm. 4. Ingerlatseqatigiiffiit imaluunniit inuit ataasiakkaat pisassiissutinit pigisanik aalisariutit ilaannut immikkoortunut sinerissamut qanittumi aalisartunut pisassiissutigineqartunit pisiortornermikkut pisassiissutinit tamarmiusunit 10 %-ii qaangerlugit pigisaqalersinnaanngillat."

3. 21-imi imm. 1-ip tulliatut imm. 2-tut ilanngunneqassaaq:
"Imm. 2. "Naalakkersuisut malittarisassiorsinnaapput, umiarsuaatileqatigiit ukiumut pisassamin-nik nunguutsisimasut, aalisarnerminnik ingerlatsiinnarsinnaanngortillugit tamatumali kingorna pisarineqartut ukiumi pisassiivimmi tullermi umiarsuaatileqatigiiffimmut pisassiissutigineqartunit ilanngaatigineqartussanngorlugit. Tamatuma saniatigut naalakkersuisut malittarisassiorsinnaapput, umiarsuaatileqatigiit ukiumut pisassaminnik tamakkiinngitsoorsimasut, ukiup siuliani pisarinngitsuukkat amerlaqataannik ukiumi pisassiivimmi tullermi pisassiissutit ilaneqartartussanngorlugit."

Imm. 2 aamma 3 matuma kingorna imm. 3 aamma imm. 4-nngussapput.

4. 25-mut ilanngunneqassaaq imm. 1-ip kingorna immikkoortutut nutaatut
"Imm. 2. Naalakkersuisut aalisarsinnaanermut akuersissutit pillugit paasissutissat tamanut nalunaarutigisinnaavaat taamatullu tamanut nalunaarutigisinnaavaat pisassinneqartut qanoq amerlatigisunik pisassinneqarsimanersut, tamatumunnga ilanngullugit pisassanit qanoq annertutigisumik pisaqartoqarsimanersoq, aalisarnerni pisassiissutit qummut killilerneqarsimatillugit. Taamatuttaaq Naalakkersuisut tamanut nalunaarutigisinnaavaat paasissutissat umiarsuarmiit umiarsuarmut nuussisarnermut tunngasut, angallatinik attartornissanut paasissutissat aammalu akuersissutit allat tunniunneqartut una inatsit tunngavigalugu nalunaarutilluunniit uuma inatsisip malittaatut atuuttussanngortinneqarsimasut tunngavigalugit."

 

2.

Inatsisartut inatsisaat atuutilerpoq ulloq 1. december 2001.




Namminersornerullutik Oqartussat, 12. november 2001.




Jonathan Motzfeldt

/

Hans Enoksen

 


Nassuiaatit

Isumaliutissiissut